新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回翻山越嶺目錄
  返回遊記目錄

 

鶴咀

誤打誤撞之下竟然能夠踏足多年來夢寐以求的極地「真.鶴咀」。

隊員:Wai, Chyee, Sylvia

 

話說前一晚睇返n年前行山d相,忽然勾起了閒遊鶴咀半島呢個念頭,於是就拿拿聲出post。勢都估唔到呢d咁頹既活動竟然會有3人出席…

1030筲地恆集合,照舊1035先出門口…會合後搭9號巴士入大風坳,乜都唔諗,一落車即上鶴咀山。

好快就遇到一連串巨壁,太惡…幸好有唔少絲帶可跟,如果唔知頭唔知路亂咁爬既話我諗唯有飛墮落山。

真係爬個不停。

過晒d岩之後繼續上山,開始入霧,由於3人皆被毒霧燻至神智不清,加上d路真係亂到離譜,所以竟然圍住鶴咀山北峰兜左一個大圈,最後仲去返原位,太神奇=_\=d路多到連威威都r晒頭,結果要出動埋指南針先搵到方向。向鶴咀山頂進發,沿途有好多好靚既小花花。

鶴咀山之顛。要上黎真係唔易,話說途中隊員威獵食了無數營養奇高既蜘蛛網,隊員痴更被毒蟻襲擊,導致半隻腳掌爛掉了…

山頂竟然係一條大石河,太癲,標高柱就係石河最高點,真係難以置信。可惜今日太大霧,山頂能見度30m,如果唔係風景一定好靚。

山頂隔離就係一大堆發射站,密集既建築群令3人被困於此,完全無指示邊度落山…最後搵到條馬路落山,但係落落下無啦啦有道鐵閘,仲有個食蕉飛奔埋黎,3人大驚。個食蕉抄完我地身分證之後先開閘放我地走…

完全唔知咩事,繼續沿馬路落山,見到路邊有好多奇怪裝置,太型。條馬路又長又斜,落到腳都爛埋…行行下又迷路,搞到要剷林1hit,遼闊既荊棘林帶令隊員精神度暴跌至零,最後更剷到出海邊。

出到海邊有個大海蝕平台,淨係見到有個牌樓,此時此刻都仲未知自己去左邊…順帶一提,o個頭d海水真係超清,如果天氣再熱少少應該已經全員飛撲左落水。

右面d崖太惡,綑唔過,又唔想剷林返上去,決定試下向左面小綑一下。

綑綑下見到遠處竟然有建築物,沾沾大喜,心諗過到去d屋度一定有大路走,於是威威化左個靚妝慶祝一番。

去到間屋度,竟然見到有排鯨魚骨,3人心中充滿了問號與感嘆號。

再向前行,無耐就到盡頭,決定小休一下睇下風景。凝視著對面個荒島,心裡忽然有了驚覺:呢度就係鶴咀極地?再諗諗,再望真d,對面真係狗髀洲,太癲!!無啦啦竟然黎左真.鶴咀!!此時此刻心情實在激動得難以形容!!

咁難得黎到真.鶴咀,當然要留住最感動的一刻,nice∼

待心情平伏之後,行返去間屋(原來係研究所)附近終於見到有條馬路,於是就沿馬路閃人。

行行下見到山邊有個大窿,決定落去一探,發現原來呢個就係傳說中既雷音洞,一個好有睇頭既吹穴,名副其實,洞內浪濤翻騰之聲果真如雷貫耳,太讚。

繼續沿馬路上行,無耐又見到有道閘,原來我地要穿過電信局範圍先可以出到去…無計,照實同個看更講我地係行山既,好彩佢都好好人咁要我地登記返就走得,仲同佢閒聊左一陣,佢問我地山上面係咪好多蛇,阿威答:係呀!我仲見到蛇倒退呀!搞到看更叔叔r晒頭=_\=同時,登記紙上『探訪目的』一項已被阿威填上:hiking…

終於出返黎d正常既公眾地方,謝天謝地謝埋天華。阿威開車返鶴咀村稍候Chyee同Sylvia…

閒蕩鶴咀村,有花可賞,仲見到鶴咀教學大廈上蓋有一名校工正孤寂地坐著、呆著、望著、待著…

睇埋座更樓就急降德己立廢堡,幸好最近有人開過,條路唔太密,不過就勁多蚊。終極高手Sylvia實在太強,佩服佩服,佢d攀爬神技睇到阿威同Chyee目瞪口呆…

之後綑邊返礦場灣,中途經過d石河入口,不過實在無心一探。

無啦啦灑左幾粒雨,d石濕晒。到小水城劍閣,幾有氣勢。

綑過幾次了,唔知點解總係覺得一次比一次難…last個位要飛躍1hit,不過今次竟然連條繩都無埋,太過份…

綑完邊即上鶴咀坑,間唔中仲有幾幅唔矮既濕壁要爬,搞到Chyee同阿威都有d濕濟,高手當然無問題啦。個坑位超焗,爬到有d中暑feel…

上到鶴咀道離澗出返大風坳,Sylvia搭車走先,阿威同Chyee就經石澳坑落石澳沖身,之後搭車出筲箕灣食雞蛋仔,太出色∼

2006年4月9日

返回上頁返回首頁返回頁頂

 

Email