新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回翻山越嶺目錄
  返回遊記目錄

 

地圖縱走港島(下) - 孖紫徑

赤柱會合玩完上半場既隊員,繼續完成縱走港島既行程。赤柱起步,沿計劃中既衛徑大路翻過孖崗山及紫蘿蘭山,下降黃泥涌峽暴走渣甸山腰引水道,接金督馳馬徑登紅香爐峰,賞罷維港夜景後落山咬飯。

隊員:Pui, Lok, Fa, Wai, ABC, Chyee

 

打巴入赤柱會合一眾隊員,完全唔識路搞左一輪先搵到佢地。

食飯既時候隊員威又搞事,見人影結婚相仲大大聲話人地個伴娘唔係好得,結果比人串左一野=_\=

咬完飯起行覓路去衛徑入口,起停車場迷失左一陣先找到監獄旁的碎石泥路,今次唔使穿越監獄,點知越行越密,最後仲要游林先返到上大路,一出黎已經係衛徑既入口!

大路登山,一開始經已係咁上,撻哂皮。痴兒因明天要跑樂善要留力,一路上力勸我地唔好上紫羅蘭,但完全無人理會。幾經辛苦上到孖崗頂,近觀對岸一連串神秘的山脈,相信要到大徹大悟之時才會染指這一片徹悟級既密林。

下降孖崗山終極斜石級,可以想像到如無此段石級可以一玩FreeSlide.com。回望孖崗山發現其北面有一大石峽,似乎可以一探。下山之時遇到許多正力登孖崗山的遊人,星期日衛徑真係熱鬧。落到去淺水灣坳經已力盡攤屍…

到這一刻痴兒仍死心不息力勸隊員避登紫頂,可惜得唔到隊員既憐憫,下一站紫羅蘭山頂。上升不久已可見到下方的大潭中水塘。

幾有趣的一個山坳位,一邊陰一邊陽。仲起度比痴領隊昆左上山=_\=

過多一個山仔就到分叉路口,左面可登紫頂,右邊直接落山。一登隊員先暴走過紫頂,其餘隊友留下同路牌影造型照,影完就先走一步。

下午的天色十分不俗,微藍的天加上片片鱗雲。

上完頂再暴走追先行的隊員,去到接近黃泥涌峽才會合得到。

十分礙眼的陽明山莊。

先觀賞完日落才繼續落黃泥涌峽。亦意味著繼續行程既話便需要夜行,其實全員都知道是次行程會夜行,因為計劃左去紅香爐峰睇夜景,但係唔點解全隊員只有一個人帶左電筒,十分離奇。

落到黃泥涌峽再接入渣甸山旁的引水道,十分好Feel的平路,怒奔走左一段,意圖扯爆痴兒,等佢聽日撻皮!一路上天色漸黑,回望返背後的聶高信夜色,十分不錯。

引水道後段變得崎嶇,仲入左一段亂石,好采最後都有驚無險去到石礦場坳,再一次出口馬路留影。痴兒因為要趕返屋企煮飯先行脫離大隊撤出,傳聞佢獨自離開之時遇上了靈異事件…

至於大隊繼續行程,馬路再接金督馳馬徑前往紅香爐峰,登山的路有小密,加上全隊只有一支電筒,遇上了少許麻煩,不過最後都成功登頂,山頂的亂石堆可以攀玩一番,不過入黑不宜,都係欣賞下港島夜景啦。

果然係一個睇夜景既好地方,整個港島北岸、維港、同九龍都盡收眼底,唔錯唔錯。成功完成縱走港島路線!落山食飯!

2005年12月10日

返回上頁返回首頁返回頁頂

 

Email