新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回翻山越嶺目錄
  返回遊記目錄

 

鳳羽翔空

路線:昂坪起步,經貝納奇小徑進入鳳壁石澗猿啼峽,繞林登鳳羽壁頂再闖密林亂石區橫移到達一樹坡大休。再出發沿一樹坡上行進入鳳冠南巖,隊員Dino於鳳喙峽浴血後羽化翔空。其他隊員則由經由地塘仔出東涌回程。事後發覺全日既行程都係在一平方公里中打轉…

領隊:高手小DD
隊員:Pui, Lok, King, Dino, Wai, Fai

 

十點準時到達昂平。阿樂已在車站呆等了好一陣子,人齊可以出發。

出發前先黎一個簡介,小DD發現自己十多年前的作品之影印版,得知作品咁受後輩推崇,十分欣慰。

出發!去到觀日牌坊,眾人想盡辦法都不能上攀,放棄相影算數。在牌坊附近發現有工程進行中,什麼「心經簡林」云云…很吊。

合照完沿貝納奇小徑出發。好快就到左鳳壁石澗入口!

遠望猿啼峽,左飛簷崖右鳳羽壁!先去鳳羽壁底一探。十幾廿米倒崖!

我地d醒目仔梗係唔會正攀啦,由右面的碎石泥坡繞上壁頂。但係呢面既危機亦不煌多讓,虛石枯木極多,特別係跟住阿威上既人更是充滿危機!發現一巨石台,獨自上攀一探。上面頗開揚,可以睇哂猿啼峽。

遠攝在鳳羽壁頂的隊員。呢個時候突然見到一隻赤p起崖頂縱身一野跳落鳳羽壁!!極之精彩!見到佢沿崖中的斜棧道極速下降!落到底都無事!!勁!

對岸是鳳壁石澗的簷崖棧道,險到呢。

影完相會合鳳羽壁頂的隊員,準備上攀鳳羽壁上段。阿威再次被困,要高手出手出腳相助!

鳳羽壁上段,經眾人觀察後覺得可以一攀,再先由攀爬力10的Dino先探。一眾隊友見到Dino出盡了所有浮誇絕技才能翻上壁頂,決定做醒目仔放棄攀爬此壁。在壁左的林中發現一堆亂石可以一攀,由隊員樂先行開路。

有一懸空橫跨位頗為嚇人,而身旁的老樹亦不太可靠,但唔靠佢又唔得,真係矛盾。之後的小棧道為亂草所據很是難行,就算Dino放繩都無乜用…最後右折返回鳳羽溝沿澗而上接回一樹坡,起呢度玩左成個幾鐘…

在一樹坡久等了的阿輝及小dd。一樹坡十分別致,很喜歡這種蒼涼的味道。

在這裡小休食野影相。

高手與你同行,慘遭阿威毒手…

一樹坡遠觀昂坪大佛。

發現極佳影相石台,下臨一樹左右坡中間的深淵。再出發沿脊上行。

左手面是鳳凰山,左起倒腕崖、鳳尾脊、凰峰、鳳峰石河、鳳頂。

一樹坡上段極多巨石可攀玩,但係好那碎。甚多有意無意的落石!

出石台黎個獨舞一樹坡,影完相離開既時候踏了一野虛石,突然無左個腳位嚇鼠我!隨之而來的是山谷下傳來巨響及隊友們獸性的歡呼…

離開巨石帶,走進一片很漂亮的草坡。

突然見到天邊有一將星殞落,兇兆!!!高手競心知不妙,預計有事發生,立即站在高處四周看察!

大伙兒準備進入下半場的鳳冠南巖。放棄哨牙石,第一站鳳喙峽,就係一年前鳳塘一役誤闖之地…

見到卡通鼠石!不過最似都係個咀,有牙齒形。下降鳳喙峽!遠觀茶壺咀,今天本欲一登,可惜時間已唔許可,而在這時更發生了狀況!!

身後突然傳黎呼叫之聲,回頭一看只看到下跌中既Dino 同一塊巨石從腳邊滾走…立刻參扶起Dino,見到佢髮絲間滲出鮮血!一企起身d 血係咁滴落地!大鑊!!

急救員阿威立即出動進行搶救,而大家亦立即決定Call直昇機求救!! 急救、定位、通訊、仲有拍攝!迅速既分工合作十分出色!

幸好初步估計石塊無直擊頭部,安心下來!慢慢等待直昇機出現!除了頭部,Dino的左手三隻手指亦篤岩石魚旦受重創,頭破血流既Dino當時仲迷迷糊糊咁問「唔知以後仲攀唔攀到石?」完全感受到佢對攀石既執著同熱誠,真係聞者傷心聽者流淚…

出現了!太癲!直昇機首先在上方盤繞,阿樂在峽頂擺動衣服指示出我地既位置。好快就確定到傷者既位置並派出救援人員空降事發現場。直昇機捲起的氣流十分利害,周圍草樹飛揚,連眼鏡都捲走左!

替傷者初步檢查一輪後就將Dino吊上直昇機了。我地將整個過程以多角度拍了Movie!
現場感一絕!實在係太精彩!!!

人去樓空,在案發現場只餘下染血的石頭及砂布…

而我地亦不作久留,離開這個傷心地。離開既時候一線生機被雲霧覆蓋,為Dino既離去添上了一份哀愁。

搞掂左Dino都成四點,下半場的行程唯有擇日再戰。大伙兒沿鳳徑下降至觀日牌坊向消防員叔叔報到。

在牌坊下合照,可惜已少了一人…   彷彿聽到遠方傳來的喪鐘之聲…

決定省回車資經地塘仔出東涌回程。一小時的步程出到地塘仔,等左好耐都無車,於去步行返東涌…等車期間不斷懷勉Dino離開的一剎…出到東涌散隊,我同阿威做代表去打探Dino的下場。

到場時阿花已經在床邊陪伴Dino,而佢全身衫褲已被剪爛,穿著病人袍躺在床上。得知佢連左七針,但無乜大礙,無撞到個頭,應該唔會變得更癲。為免佢忍唔住對護士姐姐落手,我地建議當局派男看護照顧Dino以策安全。大約九點離場,Dino由家人照顧回家了,而我地就出屯門巿食飯!

 

頌癲

為左記念Dino 今次既墮坡爆頭事件,賊友們黎個舊曲新詞創作以歌頌Dino 之事蹟。

超級驚惶 (K歌之王) Lok

你仆街仆到爆頭也別咒眉

我願意和你叫直昇機

無繃帶膠布藥綿有條毛巾

可吊住斷臂不需截肢 做個支柱

誰人又相信出到飛機吊走這個人

來吧送給你以多角度來回地拍Movie

誰人又聽過石頭埋掉了癲佬這個人

嚴重跌底你無呼天叫地血卻爆了那麼多

將那兩L鮮血一一灑到銀河

誰是下個 我很想生存喎 

超級驚惶是我

 

鳳喙劫 (燕尾蝶) Wai

就似仆街 然係癲佬墮下

頭部受傷惡化 七針都似繡一朵花

力竭聲沙 護士也都不理他

如在病榻滾來也不想記得起鳳喙峽

連7針 (17歲) Dino

廿三歲奶野的那天 舊石太痴線

爆江墜進山坡那一刻 d血好新鮮

記得呀威、小dd、Pui Lok King 與輝

齊保護我一起作戰

好鬼快 直昇機終於把我發現

救起我 送我去到急症 打針又插線

賊船行旅 活動離晒譜

無時無刻總會有意外在身邊

賊船行旅 成日都係咁

如爬山攀澗意外難避免

任他風雨 無法預知 但我知 友誼真摰

啦啦啦……啦啦啦啦啦

2005年1月7日

返回上頁返回首頁返回頁頂

 

Email