新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回翻山越嶺目錄
  返回遊記目錄

 

地圖環湖出咀

經典零補給、零退路的不歸長征路線,以至有「出咀摸水係高手」既傳說。04年初試鎩羽而歸,止步於跌死狗。經過兩年招兵買馬,今趟重踏出咀之路,終於成功踏足黃竹角咀盡頭!

隊員: Pui, Lok, King, Syl, Fa, Dino, Tong, Wai, ABC

 

原定兩點集合,搞一輪又遲到咁,最後成4點幾先入到烏交騰會合sylvia…

出發之前先打打底,拉大隊去士多咬個麵先。傳說花隊員4點會追龍而來,可惜電聯失敗,由他去吧…

食飽好上路,起行之際下起雨來…各人都預備一下防水裝備,樂隊員更出動新購置既浮誇Raincover,希望一陣俾樹支勾穿啦。

選走環湖郊遊徑,一起步就扯上馬頭峰,重裝之下都暴走,命都無!

小休一會欣賞下煙雨淒迷既淡水湖,之後繼續經赤馬頭、橫嶺、大峒前進。

7點到達觀音峒,雨勢漸收,天已黑齊了,雖然速度都幾理想,但估計都要10點先可以出到大嶺。

落紅石門坳上鹿湖峒,落山途中見到跌死狗方向有頭燈的閃光,似有隊伍迎面而來,難道是出咀回歸的隊伍路,玩到入黑!?勁!心想一會可以來個感人相遇,但上到鹿湖峒之時竟發現不到其隊伍,嗯…估計已由鵝髻頂方向逃逸了,可惜。


8點3到達跌死狗,小休一下印塘夜照。

脫離郊遊徑踏上真正既出咀之路,本來依小路行進問題應不大,但夜行黎講呢段路真係唔係太清晰,不時要搵路,還迷路了一兩次,依小路誤降了山岰水源路,搞到要黑夜打林返上脊,全隊精神力減半=_\=

一上返脊驚見前方對峪山腰位置有一燈光閃動!!花∼∼∼∼∼!!!嘩呢條友真係太狂野!一條友黑夜追龍追到出咀,仲追到過埋頭,徹底打破了當年癲哥哥的紀錄!!隊員們加快腳步,終於9點在白角山前的位置感人會合到臭花!Yahoo!

白角山至大嶺一段坡度比較平緩,但多半要在疏林中穿梭,樹叢中的漬水弄著全身盡濕,更濕滯的是GoreTex鞋完全發揮到佢防水既作用,裝哂水!Happy!!歷盡艱辛,終於在11點到達大嶺!由烏交騰至大嶺花費共6小時!

在爛鬼英軍石堆附近落腳,有些許平緩空地可用,岬角對出海面停泊著許多漁船,還真的是漁火閃閃。落腳後既第一個集體活動就係除鞋扭乾對襪!大感動!重生既感覺!!

對鞋裝哂水…那尾…各人整理行裝之際阿a先生竟然搞事,公然在老燒頭頂換Dave,眾人見狀都看傻了眼!實在係太過大逆不道啦!!

落裝後進行夜宵計劃,下午食果個麵經已消耗殆盡,再唔保充真係唔掂!起零水補給既情況之下,依然使出泡麵計劃簡直係揮霍無度!但諗到有腸仔麵落肚既快感經已唔需要考慮後果了!

咬完麵再黎砌茶,石堆圍埋品茗談天,自分感覺大滿足!

考∼食飽又係睡眠時間,打橫排開天為被地為床,晚安各位。幸甚成晚都無落雨,落探員新購入既MHW風褸都無用武之地了,露宿既暴寒情況無想像中咁岩重,但被蚊滋騷擾實在可恨,睏在最邊位仲要擔心有蛇仔典上身…Happy!

總計都睏到4個鐘,露宿黎講都算係唔錯架啦!

六點零隊員們都陸續起床了,又係咬麵時間,嘆返杯熱飲抖擻抖擻精神,準備第二回合行程。

早餐後輕裝出發,覓路下降黃竹角咀,沿依稀小路步至山坡盡頭。

左折下降爛泥草坡落峪,落到海邊之際竟發現山峪中有小溪一道!水量算是十分充足!


考,沿岸少綑一段至鬼手岩,輪流一登留個紀念。

岸邊肆意攀爬,阿花走出海邊石台耍酷,只會落得被隊員掟石襲擊既下場。

在鬼手岩前的小石灘大休睡覺,咁辛苦黎到黃竹角咀都係為左咁。

九點,係時候回程,大伙兒原路返回老巢,阿家姐開頭仲諗著中午可以返工,實在係太天真,呢個時候…只有在黃竹角咀打返去話自己好病一途=_=。收拾行裝準備離去,對襪掛左成晚都唔乾,可惡。臨出發,有Banner拉…垃圾…

十點三離開現場,各人身負唔夠2L水,希望捱到返去啦…

回程沒有行錯路了,初段速度都唔錯,12點路邊大休午餐,有癲哥哥預備既粟米係一個好選擇,含水量十分高∼黎講今日都算係陰天,只係簡唔中有一陣太陽,還有些微風,如果唔係一定唔夠水返去=_=

為了省水還得採山棯食解渴…真土法。到了跌死狗,決定走捷徑,由山腰路穿落郊遊徑省回一段上山路,但穿林依舊令人太累。

話說隨公子今日開隊綑鳳凰笏,本想來一個感人會合再攔路劫水,可惜最後都見唔到佢地既蹤影…最後十K郊遊徑,水…不多;力…不多,隊形不復存在,有力的去吧,殿後的成班都變哂龜慢慢走到生命的盡頭。完了。

2006年10月1日

返回上頁返回首頁返回頁頂

 

Email