新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回翻山越嶺目錄
  返回遊記目錄

 

杯靈雙渡

旅界出名的路線之一,全長十多公里,由杯渡山一路殺過去靈渡山,橫越了整道西部腹地的屏障山脈。嚴重沖刷的沙質土壤令到林木難以生長,整條路線充滿著荒漠景致,要挑戰這路線一定要有所覺悟。

隊員:Pui, Lok, King

 

三位隊員都不敢輕視今日既雙渡行動,十分少有地八時集合,荃灣早餐後就撘巴士入屯門。見到近青山就是但搵個站落車,落車後發現見到IVE。

隊員樂話睇資料正路係起IVE起步,太好,一開始就有運行。 大方向沿馬路前往青山,路邊多有指示及地圖往青山禪院,唔使驚唔識路。

行幾步就開始熱,在「挹曉亭」收拾一下行裝再起行,過「香海名山」牌坊後會有分叉路,右轉係古寺,左轉就繼續上山。

去到禪院發現修建中,隨便參觀下就閃人,返去左面支路上山。

這段路全是由石塊砌成的石級,一路去到青山之癲,除左撻皮之外都幾好行。青山一帶都玩得比較少,左面崢嶸的危崖及右面的深谷都十分吸引,有機會可以一探。

青山頂下的坳位置有一亭名「韓陵片石亭」,亭內有「青山碑記」。但見石亭似有工程進行中,亭內石基全被挖出,又唔知搞乜野破壞古跡。

左轉登青山頂,山頂為發射站建築所佔。「高山第一」字刻就在標高柱的石基上下,久為風雨侵蝕,已睇唔到原有字刻咁濟,只見用紅油寫出黎既字樣。山頂大休食橙睇風景,西南面的山坡有數道險脊伸延至蝴蝶灣,應該就係5星路線青蝴X脊所在,找天要搵癲哥哥領軍一遊。

西北面是青山腹地一望無際既荒漠,九成香港人應該都估唔到香港會有個咁既地方。再向北望,一道伸延至視野盡頭既山脊,就係今日既主打路線「杯靈雙渡」,真係見到都為之氣餒…起行…

返回坳位見到一個設施相當完善既晨運場,竟有啞呤玩,太癲。唔知做乜又有大路唔行,要爬返上第一副峰頂。

返回主脊繼續漫長既旅程,由這裡去到良田坳為止落差都不算大,徐徐下坡,進行速度比想像中快。

個多小時就到達良田坳,見到有直昇機來回由良田坳運送建材去山的另一邊。

過良田坳之後既路段落差較大,第一個要挑戰就係乾山,上年玩完乾白就係上呢座山再落良田坳閃人。

花左一番工功上到乾山,差不多到達了杯靈雙渡的一半路程了,而回望後方的青山變得越黎越模糊了。

睇返都幾有趣,一山之隔西面係不毛荒漠,但東面就係繁囂的屯門巿。

北面下山,再一次路過扇石輪流一登。

繼行,去到全條杯靈雙渡唯中既險位!一段被沖蝕到只餘半米寬的小路,這段險道只有幾步長,左右雖非絕崖,只是有數米沖溝,但走在其上都難免驚心,一來路窄,二來真係會擔心不知何時小路會支持不住整條崩潰!

路程去到大半,但行極周遭既景物都好似無乜點變咁…就好似行極都唔完既感覺,極之今人氣餒,花花當年竟然黎單挑,太可惡。

搵極都唔見樹蔭,於是躲在石後小休食橙解暑。

抖擻精神完成最後一段,登圓頭山時左望谷地,見到有巨型沖溝呈同心圓狀頗特別。

在圓頭山西北下山,路設置了鐵索方便遊人落山,去到電塔位右轉入山谷位最後接返石屎路出靈渡寺。

全程連休息睇風景用左5個鐘,比想像中快了些許。


順手參觀一下靈渡寺,剛剛修建過既靈渡寺十分光鮮,寺內好多金漆花飾、大紅襯底的對聯及字詞。

嗯…「人傑地福」…竟用上新細明體,好似欠缺左少少誠意…太新淨整齊既格局反倒不似係古蹟。

但寺內外都不難找到一些古物,都係一個值得一遊既古蹟黎既。

 

相關遊記:

2006年2月10日

返回上頁返回首頁返回頁頂

 

Email