返回遊記目錄

 

旅

丹霞山第一回

「斷背山脈黑夜狂奔煙雨茫茫傻兵過河」

前言:星期四一早接到新老闆的電話叫我星期一番工,一放底電話我 ICQ 問阿沛一個問題:「今晚去旅行好唔好?」

行程計劃

由於只有3日4夜的時間,再加上有限的金錢,地點不外乎幾個,本來陽朔或龍勝梯田會係最後答案,但由於時間問題同埋唔好0既的天氣預測,最後一野率性鎖定去丹霞山,而決定左之後,第一時間…係二人搵埋競競去青衣行山,並無做任何followup,回家途中接到johnny來電,三言兩語間又多一個死士∼玩完無為的一個黃昏,番到屋企睇下網頁先發現資料少得可憐,撲去圖書館料亦不多,幸得友網敢人聯盟的珠玉在前心中才有一個底,暫定用三日盡玩丹霞山風景區,晚上和隊員電聯數hit後就訓,一諗到聽晚已經身處異地實在太興奮,輾轉反側左半晚∼

隊員:Pui, Lok

 

第一日(2月17日星期五)

0800集合於上水火車站…Johnny戰死,臨過關前終於搵到佢,佢岩岩起身…只好說聲bye(但強尼竟然內心燃起了追龍的慾望,電話中並無提及下去追我同阿沛龍…)

感覺十分之耐0既火車旅程,當中最有趣事情係我指住個阿叔除鞋lon起的腳講:"很臭,可以放下嗎?對不起"

到步韶關,發現無好似預告咁落雨。

而且時間尚早,食左個shit飯後決定即去丹霞山景區。

和國內其他景區一樣,一落車就有人搵生意,但比想像中溫和。

最後更好feel地乘搭機動性極強之三輪戰車衝入大閘,一度以為成功逃票…最終覓得是日…亦是全程惟一投宿處:迎賓館,房間看起來還可以,爭取時間接受算數。

輕裝出發往陽元石景區!其實當時跟本唔知會見到乜,見步行步,加上已經3,4點,心想可能淺遊算數。

好快就見到丹霞山,甚至韶關的代表景物-「陽元石」,的而且確係一條碩大無朋的壯觀石柱,但可能見圖片太多,無乜太大激動。



反而上陽元山頂的一段「雲崖棧道」就十分之有看頭,險狀和華山不遑多讓!

登上陽元山頂之嘉遁亭,風光無限,位置奇險無比,望向下面絕崖可見陽元石頂。


遠景田園水道,奇峰絕壁等一一入目,堪稱景區內數一數二出色的地方,不禁大影造形照。


下一站為細美寨,為我地參觀的第一個山寨,亦係氣勢最好一個。

由九九天梯急降後回望山頂的細美寨,實在難以想像如何興建如此建築。

落山途中有個平台可以小休睇下風景,可以遠望到巴寨群峰,話說就快會納入旅遊區之一,希望在這之前可以有機會一遊。仲見到海豹石,幾似。

天桴禲A又係一個通空的岩洞,即管鼠入去望兩眼。

山腳再回望細美寨。


落了陽元山後其實時間已不早,但二死士路經通秦橋,海豹石,將軍寨等景點的山口時不問情由便上了山,不斷加速,最終誤打誤撞下KO了這區大部份景點。

行到天都黑齊,二人步出景區時閘口都收左皮,守衛都食緊晚飯了…

回到老巢,被老闆娘的口才贏左,決定放棄山區貧苦小童玩法點小菜食,以大陸價黎講好貴下。

但最後果碟蒸黃骨魚,白菜仔及魚頭湯都做到野,而且埋單時比左折頭,由呢一刻開始覺得老闆娘係好人,吹多左兩句水,更得到去「真.秘密景點」的情報,一輪東奔西走下更定下了明天的節目安排!心內實在大喜!


第二日(2月18日星期六)

昨晚就開始落雨,心中已知道日出死硬,但見當時雨勢OK於是照原定計劃上長老峰觀日亭碰運氣睇下有無雲海,5點半冒雨出發…去到長老峰景區山腳竟然有店舖營業,誠意可加!一於食碗杯麵好上路!

嘈醒守衛上山,經別傳寺就去到另一險地「丹梯鐵索」,即使已經有欄杆有鐵鍊有梯級…都唔易行!近乎垂直,感覺好似華山的「雲梯」。

到了觀日亭,奇跡無出現,仲落得更加大雨演變成零風景的境地,只好離開…2006年2月18日的早上,全丹霞山就只有呢兩條茂利黑夜雨中暴寒上山睇日出…悲劇…

離開後出發去陰元石,沿返今朝既「丹梯鐵索」落山再玩一次。

經過別傳寺入內參觀一下,反正起零能見度既情況下想睇其他風景都唔可能架啦。

依山而建的別傳禪寺。        大雄寶殿。

離開別傳寺,正門外的丹壁刻上了許多經文。

到達元陰石,無乜特別,個人對呢D象形性器官石景興趣不高,反而之前的福音峽(=一線天)和風車岩洞等景觀更加有看頭。

過陰元石會有一觀景台,會遠望到全丹霞最過份的柱狀物-「蠟燭峰」,實在係過份之極的做形!下次要一試抄小路去燭底!

落到翔龍湖。聞說呢度可以坐船仔一遊翔龍湖返到去境區門口,但係一睇見成架大飛咁就無引,如果係木伐必定幫襯。

一遊翔龍湖的特色橋樑「玉帶橋」,造型有如一段樹幹橫放兩岸,公園內的果皮箱和某些風景介紹牌亦有類似做法,個人覺得效果不俗,雖然係人工,但同周圍環境無大衝突,有D仲幾得意添,如介紹海豹石果舊野,做到同真果舊海豹石一樣,幾搞笑,可輕易一登∼

唔撘船唯有自己徒步多3,4k返去,中途有開叉路指上「祈龍台」,見個名咁吸引又走上去行下,經過一段絕望梯級終於去到d爛鬼建築「草懸岩」、「返照岩」,應該又係山寨之類既東東。

呢度睇風景都唔錯,有幾個好位可以獵影下方既翔龍湖。

不可不提既係我地一探「草懸岩」、「返照岩」後有山路上到一個絕峽的頂部,前無去路。此時見到右壁竟然有石孔可拾級而上,上了數步竟然要向右方絕崖作橫移!下臨百米直壁,條石槽只有兩隻腳掌拍埋咁闊,而且條路轉去邊係睇唔到!

由石級外望之景,下方一片林海令人眼眩。

此時此景真係勁到賴尿!完全係無繩的長空棧道格局!死士二人空有無窮探奇意慾,見此惡勢亦只有黯然離去一途…但願越野雄心或鷹傑佢地快D一去為我解開心中呢個謎團!

返回湖邊徑慢步回山門。

於門外買入了丹霞山的介紹書籍一人一本,幾精美。

回到巢穴因天氣關係決定唔去「真.秘地」,以免浪費。退房離去,臨走前影一下屋後的小田園,真係幾出色,點菜之後阿姐先出黎採菜…幾有誠意既一間旅店,下一次都應會幫襯幫襯。

於是離開景區回到韶關市,最後更買了火車票回深圳。

以站立4小時作為此突發之旅的精彩謝幕。


全程使費(人民幣)

深圳去韶關火車飛(軟座)$129*2 上山前杯面$5*2
韶關地圖$6*2 介紹丹霞山書*2$15
很頹的午餐,垃圾飯兩碟$20 舊版地圖(依比例的,好過新版)$1*2
康師傅冰紅茶+杯面$6*2 迎賓館炒碟菜送杯面$5
往丹霞山專車$16*2 回韶關市區專車$16*2
迎賓館雙人房一晚$70 蘭州牛肉面午餐$4*2
丹霞山景區學生票$53*2 回深圳火車票(…shit,無位,企四粒幾鐘)$129*2
丹霞山新版地圖(廢的)$2*2 中計之專車優先上火車$5*2
迎賓館小菜晚飯(正!)$50
Total: 平均一人$450上下  

2006年2月17至18日

返回上頁返回首頁返回頁頂