得到充足睡眠既我第一個醒來,再次回復知覺既時候,天經已大亮,大約八時,一開始諗既咩野日出計劃仿佛從來無存在過。

估唔到可以如斯從容咁渡過一晚,係夜晚俾落探員嘈醒左一HIT,睡眠質素甚至比奇萊還要好,多謝哂特偷給我取暖 0 30!!比較 shit 既係成晚帶住對細碼膠手套睏,扎住對手成晚而家麻痺哂無q哂知覺=_\=

好貼心咁將睡袋蓋在發斗中既阿公身上之後鼠出帳篷。捱過左寒冷既一夜,浸浴下晨光感覺十分之溫暖,雖然事實上都仲係好凍=_\=。過阿花個營望下,仲有輕微呼吸聲,應該仲未凍死。再過一陣家姐都破蛹而出,一向怕凍既佢防寒工作做得十分充足,完全唔使驚佢會凍瓜。

睇個勢班友仔都仲有排睏,於是同家姐出去行個靚圈先,向回頭方向前進,影下我地住既敵樓、遠山、村落咁。

兩條友行行下諗到不如返去影下鷹飛倒仰,因為琴晚入左黑都無乜點影到,而家零負重既情況下,跑返去都完全唔係問題。

沿長城翻過兩座小山丘,其中有一段長城因為有個斷崖位,所以琴日係旁邊兜路過既,今日狀能良好嘗試挑戰爛牆,正呀!手腳位其實極多,最驚既都係落石,有d石真係好鬆散,爬起黎要多二分溫柔,盡個量唔破壞條枯枝啦。

輕鬆登頂,終於見到座落在對面尖峰上既鷹飛到仰,哎呀!竟然背光!仲有天梯架∼可九惜!都唔理啦照去,睇下可唔可以一攀埋鷹飛倒仰咁就完美啦!

繼續快步前進,如此長驅直進之下,竟然半小時經已返到去鷹飛倒仰下方,快到呢,話說呢度經已係昨日既三分一行程咁滯=_=!

玩命爬爛牆啦唔好等,呢一段斷崖比剛剛的高一倍,但佢經已爛無可爛,可以甩既石都已經甩哂,爬落反而更安全,不過只限去到近頂既飛鷹展翅位,雖然只差少少就可以全攀,但倒攀爛牆就絕對搏唔過=_=。

隨便影個相留個紀念就閃人,重踏昨天既長城峪繞道極速撤退∼

返到去班友仔岩岩起身,一齊收營食個靚早餐,隔夜麵包栗子同香蕉乾∼

準備開始第二日行程,臨行之時梗係要同保命敵樓感人合照一個,無左佢我地真係唔掂!

出發!又要變返Full-Armor好唔開心T –T。

離開敵樓從踏上北京結,琴晚差d死都無心機介紹北京結,今日補返:北京結係內長城與外長城的交匯點,東至慕田峪,北通九眼樓,西達黃花城,就如三道來自不同方向的長城如飄落的三條絲帶,結成一個巨大的花結。

所以呢,亦係我地向左走向右走既時間啦,原來我地既打算係連遊埋北面既九眼樓既,正想在北面的出口穿門而出之際嚇左一跳,一出門口竟然就係8x度急降既「樓梯」,下方走勢了平緩一段後又突然俯衝下山,完全睇唔到背後係乜環境,於是先放低行裝落去一探。

開始下降第一段感覺都幾危,搞一輪之後落到去平台審視下第二層,難度差唔多但再長d,當年師太好似話起呢度輕鬆爬上黎,但今日重哂裝要咁下降就真係牙煙左d。

北京結峰會,無奈決定放棄九眼樓,眼下有兩個選擇,一係回頭覓路落峪返回西柵子村完成;二係西行黃花城長城至遠方山峪中的小村莊,應該有方法離開。商議後決定一路向西!咁就唔使行回頭路啦!但諗返都幾癲,其實當時手上只有一張抽象連繫景點既線形地圖,亦都唔知果條就係黃花城長城,只係覺得大方向可行,好驚去到村落之前會遇到三面絕崖既屈機境地=_\=

沿著黃花緩緩向西而降,名為黃花既長城果然多了一份溫柔,唔似箭扣咁大上大落,d斷崖下下都咩A命。

途中又經過兩三座敵樓,感覺上保存得比箭扣的好,大部份的二樓都十分完整可以爬上去玩。

行程相當順利,估計去村落既路都行左一半,亦都無遇到任何大難關。

中午時份在一座大敵樓內避避風兼完成我地長城上最後既一餐,今晚就可以大魚大肉架啦!加油呀各位!開餐時我唔小心跌左一舊仔午餐肉落地,零猶疑第一時間執返起食啦!唔通唔食呀!肉黎架!!睇黎經此一役,大家既求生意志都升左2個Lv…

食飽繼續上路,後段更加係越來越輕鬆,好多平緩路段。

睇住離條村莊越黎越近大大提升了大家既精神力,開始出現返d飛躍造型照重裝版∼

不知不覺行到了山坳位,就在旁邊發現了一條小路離開長城伸延往村子的方向,我地幾乎可以肯定呢度就係我地長城之旅既終點啦!!拉旗!一面沾滿了暴寒鼻水既旗,見證了長城之旅的悲壯!

隊員們實在係太興奮,完全放棄菠蘿蓋咁半行半跑的落山,好快小路就引領我地到左村子的馬路,完成啦!

終於重返文明啦!落落佢好激動!佢fire條路!

收拾好心情,下一步要做既係入村收集情報,睇下有無交通可以返回巿區,入左一間類似係食店既庭園入面,見到個花園的草變哂一支支冰…應該係琴晚d殘冰仲未溶哂…屋裡走出了一個婦人同我地搭訕,得知我地想諗車返懷柔既時候,就話今日得返最後一班開往懷柔既公交車,發車時間係五點鐘,睇下隻錶:1658!?

第一時間全員疾走返村口,幸好還趕得上,還有另外的村民在等車,公車應該未到。果然再過多幾分鐘,一架中巴車就慢慢向我地駛黎啦!∼

上車,成個人鬆哂,啟動沉睡模式。

打開眼經已重返文明,返到去懷柔啦∼!第一個任務係要食返餐好既,麥記啦唔好等,廿九幾蚊一個餐都唔理呀!!

有麥記MM可以調戲架XD!

一邊回想暴寒既情況一邊嘆熱朱固力…點滴在心頭…

食飽閃人,再次沉睡模式夜車返北京。

今晚既落腳點係特偷介紹返既青年旅舍,七個人包哂一個六人間,幾雅致既間房仔。去到CHECKIN 既時候仲發現無數高挑既國內外佳麗,搞乜!?明查暗訪之下發現原來成班麻豆比賽既參賽者住左起旅舍!仲見到D麻豆起走廊度練貓步架!YAHOOOO!

安頓好又係時候出去搵野食,今次真係要大魚大肉一番樂!。

首選王府井大街啦,巿區路盲既各位出左地鐵後又開始亂行啦,夜巿暴走左一輪都搵唔到野食,仲越行越夜好多鋪頭同小食檔都收左皮…咁早收=_\=!?

最後唔知點樣盪左去東華門,起一排收哂檔既夜巿攤位後面見到一間食店仲營業緊,門面細細但掛住左個超大碼招牌大大隻字寫住「大碗居」。為左唔想今晚肯德雞結局,一致通過大碗居。本來亂入之下都無乜特別期望架啦,點知誤打誤撞都點中好野,入到去有個靚仔廂房自成一閣先贏一仗。

之後一個服務員MM奏瘚P過我地睇,感覺十級清純!一開口仲不得了,把聲甜到瀉哂!成班垃圾就係咁留難人,明明D京腔聽力得兩成以下都要人地介紹呢樣介紹果樣,搞到人地面都紅哂,差到喊!雖然係對住班咁既人,但佢由頭到尾D服務都超親切,就算之後上D菜全部都係茄子伴碟,相信落探員同特偷都會俾滿分呢間野!

食物方面亦都無令人失望,絕讚既北京片皮鴨同白切肥雞當然係屍骨無存,對於唔太好辣既我地,連癲哥哥酷愛既麻辣麻婆豆腐同我隨心點既水煮牛肉都清空九成以上,辣油都用黎撈飯呀!美味既程度可想而知!

最後食到個個肚都撐爆,埋單都只係震撼價200個大洋,圍番一人三草。

環境: ★★★★☆ 服務: ★★★★★ 食物: ★★★★★ 價格: ★★★★★

大碗居,確實係無理由唔力推!

食飽~ 回老巢睏個靚覺,投入高床軟枕既懷抱uwu