海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖白角賞石

嶼南綑邊賞石路線,石壁水塘起步入大浪灣開始綑邊,訪白角賞岩岸彩石,白角海岸的岩石無論質量都不比黃竹角遜色,但訪遊就方便得多,絕對係賞石好地方。下半場意圖綑至狗嶺涌但因時間關係放棄,極速折返白角沙灘出石壁完成。

隊員:殿後, Pui

 

起身既時候窗外狂風雷暴,放鴿意欲 120%up,打比殿後唔通,呀頂…唯有出發…=_\=一路上風雨同路,今日都有水戰既覺悟,但撘地鐵一出陰澳就竟然有90%既藍天白雲!奇蹟!!

東涌買個早點,會合殿後就出發,咁好天氣無理由唔原定計劃白角綑邊,嶼巴入石壁,中途經過伯公坳突然入霧,好彩只係一時驚愕,落返長沙又好好多,太好。

石壁落車,見到水塘水位頗低,露出一個小孤島,於是二人便落水塘打個白鴿轉。乾到呢…似礦場多過似水塘,翻過一兩個碎石丘,遙望意圖一登既小島仔,好兩遠都係放棄,唔係分分鐘日落都唔使走。

離開水塘由馬路入大浪灣,經過村落時不免會比小否歡迎一番。到達大浪灣,零遊人,砂不是幼砂,水不是清水,但就OK乾淨。在沙灘收拾下行裝就開始今日綑邊之旅。

今日其實有兩個計劃,一係先引水道入狗嶺涌再綑返大浪灣;二就係掉轉大浪灣綑去狗嶺涌就引水道撤出。但時間控制黎講二較保險,起碼入黑前出到返引水道就安全了。


由大浪灣綑去到去白角沙灘一段十分平近人,黎講無乜特別難位同必要既泳渡位。

但當然要少量既攀爬總係少不免的,而對全身入水有覺悟既人黎講,泳渡一些峽位會快捷好多。景觀方面就仲未有太多地理野睇,可以專心玩下攀爬游下水先。

中午時份去到白角沙灘,就地大休午餐。

殿後竟然在防水袋中取出糯米雞一隻!太惡既午餐!天色越黎越晴朗,無限藍天白雲附送索罟群島!本以為今日會水戰,身上只有400ml水,點知突然烈日綑邊,真係多得殿後十撲回魂梨兩個,唔係應會死起白角。醫飽肚就沙灘攤屍一會哂個日光浴。


下半場開波,經過一個石灘後便是白角的岩岸。


白角果然有料到,岩石d樣即刻變哂,黑白紅橙黃綠乜色都有,不同的色彩的岩石又交織成千變萬化的圖案,讚。

綑白角的難度較剛剛大浪灣的一段高少許,需要頗多的攀爬,但都仲未有必要泳渡位,一路向狗嶺涌方向進發。中途都有兩多個難位,要慢慢試番點心思才可以攀越。幸好風化水蝕了的岩石提供了無限手腳位,但亦要試清楚受唔受力先好用=_\=。






慢慢細綑欣賞岩岸,唔知道有無乜特別景點,什麼狼牙壁、什麼畫廊圖騰等亨化名字可以隨意自己對號入座。


個人黎講最鍾意就係呢一個位,波浪紋千層糕。

繼續前進,過左一個小沙灘後便要翻上一個石脊。

一眼望去,再綑下去就必要泳綑連擊,驟眼睇起馬要同四五個海蝕洞玩。於是沿隱約小路沿石脊上攀。

竟然登上左一個劍脊!!極之恐怖!!

半米都無既落腳位加上極碎既土壤,簡直一步一驚心。而更糟既係發現前無去路!去路被一大片健康既叢林吞食左!!唉頂唯有原路退返落去,再在海邊觀察一會…

嗯…前方狗嶺涌還有一段頗長的路,而且睇黎要不斷泳渡,都係原路逃脫比較著數,只要綑到返白角沙灘就有路上返鳳徑。雖然對原路撤退感到極之氣餒,但都唯有安慰自己順綑同逆綑唔同既∼

撤退之時決定泳渡過所有難位,以最快速度離去。十分之快回到白角沙灘,沙灘之後除了有山路之外竟然仲發現到一條淡水喉!!太讚!!綑完邊竟然可以即刻淡水洗身!最後二人慢慢沿引水道死返去石壁撘車返東涌完成。

2006年4月26日

返回上頁返回首頁返回頁頂

 

Email