|
＠十點陳權早點集合，有得坐順風車入西貢真係開心。購買午餐後五人打的入北丫，消費了８５蚊，途中司機竟友善地向我地介紹萬宜水庫既風水地脈，話說萬宜北岸的大枕蓋及田尾山形像一條龍，龍口是田尾坑的內灣，追逐著西壩對出的小島，而龍頸位置則是好風水之地，是作為墓地的好選擇。
  
＠吹水時間過後特別快，好快就去到北丫落車起步，沿大路入北丫，海邊還有數戶人家居住，其中一間屋裝飾得十分別緻，用左好多靚木砌左木亭及長椅等等既設施。
 
＠步去碼頭時驚動了村否，有一個婆婆出黎唔知係制止隻否定叫佢attack，接收不良。
 
＠在碼頭旁開始綑邊之旅，初段除了一個突眼形既小島外都係悶途一段。
 
＠隨意轉島一圈，過了小島後有一小型海蝕平台，外圍隊左幾條石柱出黎，都幾得意。痴隊員為佢賜名為「百獸神殿」…嗯…＝＿＋
  
＠直至轉出蛇灣角前都無乜特別好景，加上無乜必要泳渡位，綑邊唔落水真係進入唔到狀態。
  
＠到達蛇灣岬角位置，可以以較近既距離觀察吊鐘東岸既情況，睇地圖東南岸一系列斷崖恐防綑游不能，都係要事前做足功課先。但可惜身處蛇灣角依然睇唔到東南岸既情況，被匙洲遮擋著。
 
＠轉出蛇灣角，接二連三地出現了一系列爛鬼小形海蝕洞，Ｄ窿淺到離譜，但唔緊要我地一樣照玩。好快就出現了一個海洞，終於有局住落水既位置！真開心！跳水啦唔好等！！
 
＠冰極！雖則今日陽光般但氣溫３１度，終於唔使失溫玩水啦！爽！之後海邊又一小型石柱，四四方方一條咁幾有趣，唔知有無名堂，高三米零可以一登。
 
＠掛往影相比Sylvia同Chyee拋離左，追上去時竟見大型海蝕隙位，見到Chyee同Sylvia 掛住左起對岸既岩壁上，睇黎係一段幾有趣味既橫攀，即刻要跟隊一記影下造型照。
  
＠初段手腳ＯＫ，係下方水淺壓力大少許，橫移到一半就開始有ｄ挑戰性。
 
 
＠幸好靠一個 120%濕滑既腳位安全過渡，不過過唔到都無乜大不了，最多好似痴兒咁跌落海架啫。
 
＠經過一個卵石灘，又有好景，左方既岩岸深處有一道大列隙，細看發現內裡藏了一道飛瀑，一探之必要。
 
 
＠跳海游過去，中途被水底的珊瑚及海膽生物吸引去了，先同佢地拍拍照先。
 
 
＠登陸後進入石峽，十分唔錯既格局，最深處藏了一幅直壁瀑，可惜之前既大雨經已走得八八九九，水量黎講就差左少少啦。
  
＠之後又經過了一兩個海洞吧，到了第四五個海洞，又係泳渡之必要。
  
＠今日西南五級風，自轉出蛇灣角後風浪真係明顯大左，加上船尾浪唔講得笑，特別上岸之時更要小心比浪捲拖爆。
  
＠呢個時候殿後樣就係先起海中介爆手指一記，急忙上岸之時又比浪拖爆了腳，真係雙重打擊。
  
＠安全上到岸既時候見佢腳下劃了一道血路，真．血如潮水，太癲！！流到成地都係，好彩我地有護士駐場，立時決定就地大休午餐，食飽左先至慢慢幫殿後包扎。睇黎真係介得幾深下，一而再地在止血後又爆過血，配備了零急救用品既隊員唯有出動手巾仔為殿後包扎。
  
＠等待止血期間更加入了午睡環節，就在岩岸上昏睡了一陣子，舒服到真係唔想走…
 
＠續行，無耐就到達迷幻蠄蟧灣，水清沙幼良灣也。
 
＠右折個靚灣就到左今日泳綑蛇灣角原定既終點大蛇灣，黎講灣內都泊左六七艘遊船，星期三都咁多人唔使做既？仲有不少ｍｍ在船上哂太陽，讚！
 
＠可能隊員太多能源，竟提議泳渡大蛇灣，直接遊返對岸的碼頭，百多米的泳程…ｏｋ去吧，一字長蛇陣渡海，應吸引了灣內８０％的收視，更被岸上路人評為水怪，哩。
＠殿後樣泳渡之時竟意圖單手唔濕到手指傷口，太惡，可惜最後都係要用雙手，仲令到包扎解體了，又要再出動護士。
  
＠在大蛇灣旁的廢村漫步，找找舊屋及離開的路，但感覺極之怪異，大蛇灣村既感覺十分之內地，全多是工程進行到一半就停下了似的，好多建材頹放在路旁，而更吊詭的是那裡的工人好似唔使做咁，全部都躲在廢屋的三樓賭錢＝＿\＝極之奇怪。
＠在村內走了一遍都搵唔到路，跟手就有個女工人提示我地在村左盡處有路走，先行謝過就快步離開呢個古怪地方。
  
＠果然找到了海邊的橫山路，在林路內穿梭了一陣子就到達了淡水坑，路橫跨了淡水坑下源一個極之不錯既大型流瀑，在這裡稍是休息，沖洗下身上既海水。
 
＠順手上溯一小段睇下上方係乜料，上到巨瀑頂後澗道變得比較平緩，但睇黎都ｏｋ大，在澗旁發現了小石塔，可能是之前路人隨手撘的吧。小探完便回到橫腰山路繼續去西壩方向進發。路是越行越大條，都幾好行。
 
＠上到一個小山崗竟配備了長椅，在長椅上坐下觀賞風景，竟然發現下方深篤停泊了十多艘船隻，而有好幾隻更是半沉的狀況！！正係我印象相片中的那一個地方，今朝出發之時先同殿後樣討教過知唔知香港有無個咁既地方！！估唔到今日臨完場之時竟然可以發現到佢！真係太癲！！
＠黎講我本來都係得個知字，無諗住今日連遊埋既，但殿後樣見橫腰山路會繞入深篤山谷既深處，為了省回腳程竟然提議下降深篤加遊船墓再泳渡一記深篤灣，他指住灣外的浮物圍欄認為可以拉住渡海，十分可行。
  
＠眾隊員除了水怪外都一時驚愕，竟起呢個時候加料個咁惡爺既玩法…＝＿\＝大家猶疑了一陣子，起先還是否決的，但想來難得到來不一遊沉船實在可惜，把心一橫全員一起渡深篤灣吧！！在山坳位沿荒坑下降，不消十分鐘好快就下降到深篤灣旁，極之出色既船墓！！半沉的那幾艘船破破爛爛，船身全是秀鐵，極之有Feel。
＠第一艘船的船頭有一條繩接了埋岸，Sylvia 拉繩掛起個人拍照，但佢落返黎既時候船頭竟有一部分扯了下來跌入水中…＝＿\＝驚覺破船的危險性，真係要小心行事。
 
＠在離海邊不遠處選了一艘破船打算一登，海底蠔殼滿載，埋到船身準備上船，要小心秀鐵、釘之類。
  
＠成功全員登上爛船一號，在夾板影造型照！
 
＠夾板還有一道鐵梯可以通往下面被海水浸沒了的船倉，驚慌之王的１２星活動，漆黑既船倉帶來無限既想像，睇黎都未有隊員狂妄到敢進入船倉。
 
＠小遊完破船就返回岸邊，游返去既時候殿後樣竟然老抽！？哇一陣仲要泳渡，我真係驚佢唔掂！去到浮堤，發現都ｏｋ大條，隊員們都忽發奇想睇下可唔可以好似掌門人遊戲咁樣沿住浮堤行過去對岸。當然答案是否定的，條浮堤跣到離譜，行唔夠一條就不由自主地墮海去了。
 
＠唉都係老老實實漂流過去啦，眼睇又係二百之旅，我驚我唔掂，都係執返件浮物有著數，幸好靠浮堤之助，可以在海中以高速拉動滑行，但下望海底一片虛無，莫名既恐懼又油然而生，又諗下殿後隻手指，血如潮水鯊將你我包圍＝＿\＝，都係快手渡海好了。
 
＠浮堤去到一半就完了，要靠自己游幾野接去另一條浮堤，感覺上覺得去得好慢，游好耐先去到一半…
 
＠真係太狂野既加料活動，當全員在另一邊岸搶灘既時候真係不由得要激動一番！真係太癲！！邊條旦散提議個咁既玩意，同我攞去餵魚。
 
＠成功渡了深篤灣，係時候離開，在創興後的車路鼠返出黎，反正未黎過，順手參觀一下創興個湖心亭仔，無乜特別一遊而矣。
  
＠全員打算回到馬路再步上西壩，但水怪隊員又有新搞作，唔知做乜ｑ要泳渡創興個湖，認真係多能源＝＿\＝…眾人都懶得理佢，由佢泳渡大腸桿菌與水份子比例達１：１既創興死水池，其餘隊員去到西壩先黎個淡水浴洗一洗走身上的海水。
＠在壩上小休一會檢視下行裝既入水情況，殿後樣禍不單行，身懷的高科技電子零件睇黎要轉一轉手發個大財了。而其他 Pop 隊員及Lock and Lock 隊員都十分平安過渡。收拾好行裝就沿萬宜路步回北潭，中途又見到今朝車我地個司機 Say Hi。快步出北潭，又次在萬宜路口遇到剛剛路過的小巴！！Timing 一絕！齊齊出西貢沖涼食飯∼Yo∼
2006年6月7日 |
