海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

長洲單車綑邊

為了準備明天的華山之旅,決定今日去長洲閒遊,順手討論下我地既行程同埋要預備既物資。但係最後閒遊變成左單車綑邊歷奇之旅,辛苦爆,結果當日係乜都傾唔到…

隊員:Pui, Lok, Dino, Fa, Wo, Elmo,Terence

 

相約九點半鐘在中環的大家樂食住等,而準時既隊員只有和仔一人,最後出發既時間自動延遲到11點…在中環碼頭乘撘往長洲的渡輪,個多鐘的船程。

向左走向右走。

一時左右到達長洲…商議後決定今日改成單車之旅。四周蹓躂睇下邊一檔單車好D。

雖然D車好似舊左D,不過比我地賤用都差唔多,而且20蚊踩一日都算OK。仲比埋鎖我地用。

第一次單車之旅,發現原來阿花係花式單車高手,即席表演漂移。

路邊擺放了一條龍舟,可以上去打鼓影相,仲放左D木槳可以玩。

第一站出發往張堡仔洞探秘,但係要泊低架車先。

竟然要排隊入洞,唯有先周圍玩下,跨出左方欄杆玩下出面D岩石。
研究左好耐先上攀到呢個巨岩,落黎仲要飛躍一Hit。Dino背影極似小DD。

Dino表演欄杆飛躍。  玩玩完岩石齊齊探洞,入面真係黑到伸手不見五指。

好采Terence 臨入洞之前幫襯左路邊攤阿伯租左一支電筒,夠哂成隊七個人用啦。

入口附近有一條鐵梯要爬落去,睇唔到真係仆死都唔知乜事。
出乎意料張堡仔洞入面都幾乾淨。

成個洞極短,潻黑中前行左五分鐘已見到光明既出口。不過都真係幾特別既呢個洞。

一出洞就見到另一個景點,五行石在不遠處既岸邊。

洞口仲有土法遷秋可以玩,用繩綁住棵樹吊住條木做成既遷秋,可以負二人之重。
玩完遷秋返返去奕璅恣A唔知點解決定唔行大路,要沿石級向五石方向前進…

搞到玩鐵人賽咁要搬單車…仲要穿過好多狹窄既小徑…

幾經辛苦突破左第一關,去到一個海岸邊既平台稍為休息一下…

點知之後仲甘,要抬單車攀爬岩石…

綑邊…因為加插單車環節,本來行路十分鐘既路程,結果用左成個幾鐘完成。

幾咁難得先至有一段平路可以踩下單車…但係平路盡處又係另一段長石級…不過經過頭先抬單車攀石既試煉,抬石級已經唔算係一會事啦…辛苦了女隊員Elmo,辛好這時有一小哥爆粗登場向Elmo向出援手幫佢搬左架車上山。

全體到達了五行石,但係已經肋疲力盡無心賞玩了…回望返剛剛越過既數個難關,真係百感交雜,但係再咁落去都唔係辦法,如果前面既路仲要歷奇式進行,相信聽日會無命去華山…於是同癲佬先放下單車輕裝探一探路先。

好采一探之下發現前路已展示出生機,多數都係靚路黎!唔使再抬單車啦!!!
抄了一段叢林捷徑,再上一小段山路便回到了馬路了,太感動啦!!!!
一睇路牌"往張堡仔洞10分鐘" …真係令人氣餒。

決定就咁完成今日既單車無為之行,經過今日既越野綑邊活動,連單車個煞車制都撞爆左。返去還車果時極鬼鼠,還完即閃!還完車去食Tea,被兩頭熟睡中既小貓吸引了入一間餐聽。食下麵餐、凍飲同甜品,太爽。

下午茶過後一塊兒去買糕點,坐在海灘旁吃。食完野又買左毽起碼頭踢,好耐無玩呢一個玩意,點知踢左一陣就比差人趕走左,話唔可以起呢度玩,唯有走去另一個地方玩,最後踢到個毽都散哂先至走。

就咁完成左一日無為既行程。返出市區先至真係預備明天既行程…

2005年4月17日

返回上頁返回首頁返回頁頂

 

Email