海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖北海渡 I - 往灣前哨戰

突發泳渡往灣行動,天氣唔係太好本來諗住隨便入紅石門行下,順口提起去得紅石門不如過埋往灣洲=_\=,畢竟往灣洲太大,而且又唔熟路,打算小組探遊先行試探一下往灣洲西部。

隊員:Pui, Lok, King

 

探遊小組本來包括小花,點知佢突發放鴿,太可惜,錯過左一次咁出色既行動。九點半大埔集合,但係過哂鐘都唔見人,得知隊員樂昨晚開P通頂咁濟,心裡已經預算定要同競競二人同遊=_\=。好彩最後阿樂都有出席行動,但係HP得10%…

撘綠色小巴入烏交騰起步,落車見到有大隊撘旅遊巴黎玩,要在小路上左穿右插先可以暴走頭一段悶途。在路旁苗三小溪休息一會,既隊員樂先開紀錄連續技P左三Hit,HP見底MP下降80%,為之後既行程蒙上左一片陰影。

星期日仲天陰陰咁,估唔到今日會突然咁鬼好天!係上午出發既時候都有落左一兩陣過雲雨,但係去到三椏涌營地果頭竟然開始出現少量藍天白雲!營地之前右邊有分差路往紅石門,入口有危險牌十分易認。

呢段路唔算太密,路過下枯棘林都幾好Feel,反而中段變成疏林要小心跟隨隱約的小徑前進,唔係就好易好似我地咁誤入歧途。去到馬尿河見開揚同明顯路就諗都唔諗拿拿聲衝左落去。去到一開揚澗道,有流瀑接海,抬頭又有巨型岩石組,風景真係激賞。

在澗道中小休一會就沿瀑下海,見到如此好風光全員進入狂步徒狀態,無人諗過自己起邊就係咁去,一心諗住沿海邊綑過去紅石門=_\=,之後先睇番圖我地應該係馬尿河鏟左落黎,接海果一條係馬尿瀑。而我地離紅石門都仲有一段幾長既距離…

落左黎就唔理得咁多,沿海岸推進。話說琴日係大潮,我地綑邊既時候已經開始左水退,但係水位都好高下,初段甚至要半腰入水。一開始經已係紅石海岸,搶眼!

雖然都幾趕時間,但係去到長排頭有野玩!如此偏遠之地竟然有牌樓,真係唔知比邊個睇,我地都好順其自然更上一層樓看好風光。

長排頭呢度極之寬敞,十零人起度野營開P都無問題。小攀一下,玩完再出發,行多兩步發現繼續綑岸既話要繞行一個頗大的海灣-『北海篤』,為左唔繞遠路決定興之所至立即進行泳渡計劃!

但其實一切都係藉口,只不過係想玩水所以先泳渡!!綑邊分明會快過游水好多啦!!唔理咁多,收拾行裝,做好防水工作準備入水!!

小試一擊『北海篤』,為今次既旅程帶出左十分到題既名稱-『北海渡』!但睇返圖有成200米…=_\=,仲要使用拖拉機戰術助旱鴨子競競渡海,咁游一野都幾疲。

太低能的渡海行動,驚動左巡邏隊駛埋黎兜截我地,以為我地係偷渡客,太哩=_=此時此景如果隊員樂胡亂使出普通話技應該會立即遭受亂槍掃射。好彩最後都有驚無險,同我地哈啦左一陣就揚塵而去,哎呀,唔記得問下可唔可以送我地一程去往灣添!

幾經辛苦越過左北海篤,竟然發現又有一個差不多的海灣『大水湖』,要即刻再渡一野真係唔係好掂,呢個時候終於都死死地氣走去睇圖,決定找一找大水湖篤位的小路,希望搵到山路快D接去紅石門,因為再咁綑玩落去,去到紅石門都收得隊…好彩十分順利搵到路,下望『牛角涌』海灣,幾靚!紅石門就起對岸的山坳後面啦!

成功接回正路下降紅石門,差唔多三點,本來預十二點零黎到紅石門的。路過水塘,呢個水塘既水好似係供應吉澳島上居民使用的,水質似乎OK,嗯…水源…= =+

經過被芒草覆蓋既石屎路去到一間廢屋外,有石^長_,實在係大休既好地方,在這裡小休進行午餐。嗯…呢一度宿營都諗得過…

快快手食完野直擊紅石門,由於都成三點幾,雖然已經有黑夜闖林既覺悟,但係計過度過應該都唔夠時間玩哂往灣西部,決定精華一探執毛洲先,下次往灣團如果唔夠時間可以Cut減呢Part~XD!!!經過破舊的堤壩,好古樸的氣色。

錯手使用了夜拍模式,D相爆哂光,返去用相片店試下執相,出黎個效果假得幾靚…

事不宜遲,準備泳渡紅石門!可以先涉水步行至海邊的石排。

石排上有一支石柱,作用不明,斷估與導航有關。過左石排之後水深急升,由於我地唔係起距離最近既位置開始泳渡,今次都要游100米左右,呢個距離難度不大,最驚係無啦啦有快艇駛黎=_=,都係快手快腳游過對岸好D。

耶英!全隊成功首次登陸往灣洲!牌樓掛臘鴨合照之後,沿岸邊快步向執毛洲前進。

島上的岩石一樣赤紅。途中路過一座荒廢了的碼頭。但都破爛得幾嚴重,好似推倒左既積木咁散落一地。

只餘下兩根石柱…碼頭後仲興建有上山的石級,睇黎可以通上往灣西頂,但都已經破落了,睇黎往灣從前都有興盛過既日子,返去Check Check先。

好一個雙港,東風五級既日子下,都可以有咁波平如鏡既海面!加上今日絕對的藍天白雲,景致實在不可多得!天清到可以清楚望到遠方的悟恫山!一年都無乜幾日咁清!

無睇到距離有幾遠,只顧不斷大方推進,一路上一灣接一灣。隊員樂意猶未盡,再渡一灣,我同競競就岸邊沙灘慢步。這時很哩地有架本地遊小輪經過紅石門,聽到導遊用大聲公同團友講「呢度就係紅石門啦,大家睇下果面有兩個人行山喎,咦唔係,仲有一個起海度游緊呀…」=_\=哩到呢…

哇,往灣洲既海灘有極高既海鮮含量!數十條海參圍埋一堆開緊沙灘迷幻派對,一個唔小心真係踩到佢嘔哂白泡。這邊箱又有幾十雙往灣洲魔蟹暴走,勁!

過埋漆樹灣轉個靚灣終於見到執毛洲!Reach U Finally!

開頭以為要再泳渡多一次,可能四點大潮退定關係,去到發現執毛洲與往灣洲之間的水道極淺,可以就咁涉水行過去!省回不少力氣!第一時間一登執毛洲小石丘!十分好的全景風光!朝吉澳方向遠望仲可以睇到印洲!印洲經已鎖定為未來泳渡目標物之一!

執毛洲全景飛躍!靚!好似一頂魔術師帽子!

太出色!心情極之激昂,在小島上四圍蹓躂完全唔想走,那理是要深夜迷失於紅石門!一見有船隻駛過就大聲兜撘,期望有船可以接我地走,咁就可以玩耐d…

可惜人情冷暖,完全無船家理會我地,唯有不捨地離開執毛洲。臨走在水道浮潛一下,發現水底好多短刺海膽,頭先行過黎踩唔到真係好彩。

正當我地想離開,沿路返回紅石門之際!上午的巡邏艇再一次出現!隊員樂憑著兩米厚既面皮再一次使出撘訕技,竟然成功兜截到巡邏員先生!我地無話過遇到困難需要幫忙,只係隨口問下順唔順路載我地一程。仲強調左一點:「哦∼我地都好熟呢頭D路架,紅石門後面果座咪係蚺蛇尖囉,隔離果個咪萬宜水庫囉!」

雖則我地好熟路,但係巡邏員先生好好心,為左我地既安全都決定先載我地一程去三椏灣,驚我地會夜渡紅石門被船撞瓜。就係咁成功登上機動快艇編號MP3,執毛洲點對點傳送左我地去三椏灣碼頭!!

太爽,可以坐起船頭享受一野極速飛翔!今朝搞左成朝既行程,而家幾分鐘就KO左!巡邏員先生為巿民服務既情操真係令人讚嘆!向佢地致敬!!

本應仲起紅石門苦惱緊,但突然已身處三椏村碼頭,省回不少時間及氣力!!成日都無玩過撻水!等巡邏員先生離開左就在碼頭輕鬆地練習撻水!!不知不覺間HP全滿既隊員樂狀態極好,成功練就到唔少高難度撻水技!!其中踩板最得我心,下次要一試!

其實碼頭水頗淺,到心口水左右,隊員競樂持有浮衣之助可以肆意任撻,我都係休息下幫佢地影下相好D。碼頭附近都好多魚仔,一撻水就係咁跳出水面,仲見到有蟹仔以極熟練既擒拿手捕捉跳起的魚仔!極好睇!!!玩完水在碼頭小休一會便離開了。

前往三椏村,本想食豆花,但係在路邊沖完身後十分涼快,暑氣全消決定極速閃人出去晚餐算數!

決定由最平緩既苗三古道離開,都係差唔多時候回程,遇到幾隊人馬都歸家中,路過三椏涌小河,影下相。

十分輕鬆的離去,半跑半行咁疾走出烏交騰,在等小巴時有一頭趣致小否典左過黎垠飽A隊員用所有既後備食糧利誘小否,最後將之降服!任我地魚肉!!

八點唔使就出到去大埔墟晚飯!本應仲起橫嶺既山頭野嶺受緊罪,但而家就嘆緊冷氣大魚大肉!!今日既行動可謂之大勝!!極之期待「北海渡」第二擊!!!

2005年9月19日

返回上頁返回首頁返回頁頂

 

Email