海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖小的的船河第二擊

全年天色最差既一日,煙霞大到離譜,4人參加小的的船河團,閒遊東北水域,相信會係本年度水線既最後一擊。本來會一會黃竹角咀、踏一野往灣北頂,但氣溫高企,改線閒盪了印塘四小島。

隊員:Pui, Lok, Dino, Wai

 

晨早大埔集合早點購物。

二人之遲到技,於是買外賣入大尾督對住個海開餐。碼頭有好多釣友,不停有魚上釣!好勁!!食埋野坐多一陣就人齊開船。

直出赤門海峽,路過黃竹角咀再入直門頭,望住眼前既往灣北頂,連高手都縮沙,決定取消登峰行動,都好既,往灣北頂留返泳渡一登才夠意思。

仲見到麒麟石,又係有機會要騎一騎。過左往灣下一站就係墳洲,印洲塘西面的其中一個小島。

全員閒遊模式坐小艇登島,沿岸邊逆時針走一轉,島上唯一的建築物就係呢一支類似路牌既東西。墳洲形狀有D似雞脾,行到去北端雞脾骨既位置有一道石脊可以一登行個大運。

石脊中段道闊半米,起上面行要步步為營,落返黎既時候隊員樂懷疑被生秀鐵釘貫腳,還留了少許異物在傷口內,稍為檢查過後決定繼續行程,上船先慢慢搞…=_\=

尋龍點穴,走到岸的西岸找尋墳洲上的墳。起初見唔到路上,好彩無睇唔開爆上去,行多兩步就有靚路接上此二穴,哎打搞哂!上到去發現滿地紙錢,想必剛剛的重陽有孝子賢孫黎過掃墓。這兩個墳外貌仍很簇新,都是曾姓的,睇書話係荔枝窩的祖墳。

在墳旁眺望對岸的鬼洲,行友話右方的岩石形似骷髏,但睇黎睇去都想像唔到。

好快就行左一個圈,返去會合駁艇,準備去下一站鬼洲。墳洲的石灘上有好多玻璃樽,提防提防。

有行友打算水路進發,泳渡過鬼洲!?真吸引。坐船經過一絕對平面的小島排,仲有人在其上垂釣,超有孤島Feel。後方有如兩隻凸眼的是大小稔洲。

登陸鬼洲,一見個鬼頭,癲哥哥又技癢要露一手,又唔知自己踢緊拖,嚇鼠阿叔。

島上岩石特寫,風化水蝕情況嚴重,研究過後得出既結論係癲佬應該會姪驨P既石跟手FreeFall.com。過得一頭半載就會好似呢條魚一樣。

鬼洲望返墳洲,好似有兩隻眼咁=_\=。仲見到一隻離奇之狗在墳洲上蹓躂!島上一個人都無,隻狗理應係泳渡過去!好癲!!!

又行一個大運,準備離開,此時癲哥哥才脫險歸隊。

下一站印洲,又返入印塘,估唔到第一次登陸印洲黎來得咁輕鬆。

近睇個印爛得都幾衰下,繼開果支得返一條石柱。

眾隊員意圖試攀石柱,但觀察一輪後覺得玩唔過,都係收手。觀念之時已經有團友在後方攀上印的主體。上到頂發現有一棵小小的餘甘子生在印頂!全株掛滿累累果實,莫非係神品!?必試,入口初略帶苦澀,但食完之後會留下絲絲甜味,好有趣的果子!!

在印洲頂望向西流江,嘩好近,泳渡之可行100%下年天清要再搞一搞,在印洲整返張印洲塘既360度環徊全景圖,應該會幾出色!

三條友最後都係忍唔住要落水玩一玩,澗水走出印洲對外的一個石排,有導航柱一支可以一登!

玩埋印洲返上船大休午餐,久違了既有錢人玩法,當大家咬緊乾糧既時候竟然使出煮食計劃!!帶左Cookset都唔使用,可以用船上既爐,對住筆架洲整野食真吊!!

豐富到呢!金菇五香肉丁蟹柳仲有Kona為癲佬預備既爆漿丸子。驚死唔夠食買得太多麵,最後都係食唔哂收場。

雖然食得太飽都不適宜,但係黎到筆架洲又無理由唔一玩!強襲筆架!為免溺斃都係一人執返一個水泡保命先。

成功登陸筆架,可以在筆架中間的位置攀上頂,其下有一個通隆位,但係摺唔過個人…上攀頗考功夫!岩石很碎,隨手一塊都可以扯出黎,要試清楚先敢用。

筆架洲的洲咀,一層層的沙紋,幾靚。筆架上行走,經過險脊在另一邊下降。

再走去沙咀度玩,發現大量海星,上次去爛排無玩,今次要整返張。小妹妹都忍唔住要除鞋落水睇海星。仲有d奇奇怪怪唔知係乜既生物。

玩完筆架洲,船伕叔叔介紹可以去吉澳高排果頭睇珊瑚,於是一致讚成。

果真不負眾望,發現大量七彩繽紛的珊瑚,成班人一上一下咁來回海面同海底,要影珊瑚就要同浮力對抗!唯有在海底搵d野抓實先可以對到焦!!就係咁打發埋下半場既時間,玩到四點左右就回程,超級清閒的一次旅程。

2005年10月16日

返回上頁返回首頁返回頁頂

 

Email