海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖橋咀島

籌備超過一週既長洲南丫觀包山野營行動,在出發前一晚既十一點鐘討論行程時,三言兩語間被埋葬掉。由於酷熱天氣警告既關係,再度使出率性改線計劃,改為第一日前往橋咀島綑邊泳渡探洞,晚上再入西灣露營,第二日三澗連走消暑行動。

隊員:Pui, Lok, Dino, Wai, King, 費林, Mary, 公, 棠, 孔, 和, Jacky

 

十點西貢集合完成,Dino再一次使出遲到計劃,決定遺棄隊員一名先行登船。
在西貢碼頭撘黃旗街渡前往橋咀島的夏門灣,買十送一計畫一人15蚊來回。

買票中。新造型和哥哥,殺死人咩。登上街渡不久便開船出海了,心中實在懊惱竟然睇唔到癲佬追船既感人場面。就起呢個時候見到癲佬在碼頭旁邊怒奔!癲佬!!!真係忍唔住全員起哄!太感人!!

豈料我地既舉動驚動左船家,好心既船家竟然唔理會我地既勸阻,點都要返去接埋癲哥哥…搞到阻延到其他乘客,真係過意唔去。

十數分鐘既船程經已到達夏門灣,幾經商議過後,決定全員一齊行動,前往龍眼圓頭一探海蝕洞。在燒烤場後覓路登山向南進發,亦唔例外地要加插鏟林環節。

好采距離唔遠,只係少鏟十數分鐘便到達了。重裝鏟林好辛苦!好熱!!真係要第一時間跳落水玩下消暑!!三人同遊技強襲登陸海中小孤島!!冰極清綠既海水!出色!

龍眼圓頭,為一稍稍脫離橋咀島的小島。有好多釣友在這裡消遣。

首次出現既隊員Jacky,希望唔係最後一次。攀上龍眼圓頭頂,可視察岩岸既特徵。

發現前已無去路,而橫攀入探海蝕洞亦有難度,決定採用泳綑行動,四處找來浮具…

除左爛木頭仲有廢車胎,真係要砌返隻木伐玩下生還者遊戲啦!阿棠一聲令下三名泳渡隊員搶閘而出,而忌水既隊員癲決定展示攀爬實力陸路橫攀探洞。

越游越大浪同湧,木伐乘受唔住三個人既重量,反而成為左負累,最後唯有放棄佢…
與隊員樂沿岸泳渡多一會便乘浪搶灘,少不免要被蠔殼片兩野。

癲佬同威就繼續沿海崖橫攀,到左呢崖簷位頗為考人,癲佬當然履險如夷,至於威哥仔…不難想像會使出打電報計劃,幸好最後都安全通過。

再繞過一個岸咀便看到海蝕洞「達摩洞」啦!要繼續橫攀入洞難度極高,只有隊員癲可以順利完成。另一邊水路因頗為大浪亦暗藏危機,幸好最後隊員樂在水中發現了一道暗棧直通入洞,贏左!

全員成功潛入深約十米左右既「達摩洞」。
洞口為一巨石完全阻隔,所以洞入面水流極微弱,可以慢步觀賞。

唔知似乜形狀既洞口,配合無敵晴朗既藍天,絕妙。

本想繼續橫移探下一個海洞,但係離開大隊都有一段時間啦,都係放棄計畫返去會合大隊。回程時候全員經陸路橫攀回去,竟然見到隊員棠、公同Mary加入攀崖行列向呢邊黎緊。不過見探洞隊員回歸就決定一齊返去啦。與隊員樂首次挑戰簷崖,要伸直哂手腳先夠借到位過!再一次睇隊員威打電報… =_\=

攀爬時聽到大隊那邊傳來歡呼之聲,原來釣友捉到一隻巨型海星,一眾好奇既隊員一湧而上圍觀!真係好大隻,伸直成隻手咁長都有。

會合大隊之後嘗試向東發展,但係有為數不少既危崖,為左一眾隊員既安危,都係原路打林返去夏門灣…在夏門灣小休一會,飲汽水睇MM,超出色!

三點左右在夏門灣離開,都係走唔甩要黎一次烈日登山。但係風景都唔錯,稍稍登上小山峰便可以回望整個夏門灣。真係水清砂幼兼人多。成個沙灘插哂太陽傘…

浮雲底下的滘西洲,成半個鏟左造哥爾夫球場。

越過黑山頂,在左方山坡發現不明顯路線,睇黎可以直接下降岸邊。大約同藤蔓碎石坡搏鬥左半小時,終於鏟返落海邊…隊員威竟然老點了一家三口跟我地行…

返回海邊,即時要落水降一降溫。沿海岸向橋頭方向前進。

橋頭的連島砂堤已在眼前,砂堤上好多遊人,加上遠方山嶺及耶穌光點綴!讚!!

差唔多五點幾,水已經退得七七八八,成條砂堤都露左出黎,無得游過去添…

黃昏金黃的光線灑在海面及岩石上,和哥哥與積奇正在享受這份寧謐。

另一邊探奇隊員已經急不及待一馬當先直奔過連島砂堤到達橋頭,一登橋頭的燈塔!

上午坐船黎既時候已經發現,又係一個極出色既燈塔,四面環山環海!雖然水退左,但係要一登燈塔都係要泳渡十數米!這裡的海水不及龍眼圓頭那邊清,更有一陣陣的電油味。但為左強襲燈塔,一切都係在所不惜既!!

成功登頂!加埋背面既光線,太型!!吸引左無數經過船隻上的乘客既注視。

連燈塔都玩埋,都係時候要撤退返去撘船離去,最後黎一野跳海行動。

臨走果時見到有兩條獨木舟漂過,太爽!!今個暑期一定要學識然後出海玩!!最後返去碼頭等船,坐最後既一班六點半船返西貢市,會合後Join隊員三名去體育館齊齊沖返個靚涼,發現全身露出黎既部份都哂到燒焦左咁。沖完涼簡直好似重生一樣,之後搵野食,食飽飽就預備今晚同聽日既行程!!

2005年5月15日

返回上頁返回首頁返回頁頂

 

Email