海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖石澳綑邊

港島東岸綑邊旅程,原來打算淨玩大頭洲,之後在石澳沙灘閒看風景算數,但突發率性加料由大浪灣綑邊至石澳一段,十分之惡。而最後都奇蹟地100%完成了行程,不可思議。

隊員:Pui, Lok, Fa

 

十一點筲箕灣集合,隨意購買後備糧食後就撘小巴入大浪灣。天氣大熱,無帶遮於是向落隊員相借cap 帽一頂,上次出海浸完海水未洗過,臭到呢…照帶=_\=

十蚊入到大浪灣起步,沙灘黎講多人到爆,但外國人仕居多。在瞭望台下收執收執行裝就起行,開始零準備未知之旅。

見到有MM玩滑浪,都幾好睇。

起步無耐就見到痴兒報稱被垃圾吞食了的靚潭,黎講無垃圾都真係應該唔錯既,海邊一個淡水潭,可惜可惜。

好快就遇到今日第一個難關,一開始落探員同花隊員都仲未有全身入水既覺悟,所以打算攀越這幅高崖黎講,手腳位不缺但心理壓力頗大,幾好玩,又一次見識到花隊員的LUP水狀,好睇。

點知上頂後發現另一面都係斷崖…最後都係要落水渡一記,Happy,點都走唔甩。

一路上都有大型石隙及海洞,但不太吸引。來到這裡明明經已全身入水既落探員又要挑戰難關。竟意圖在海洞頂攀過,太惡,而阿花則在洞中發現了水底棧道,涉水就可以越過唔使犯險,贏左。

路過一道石級,從前的碼頭嗎?一心以為十分平易近人既一段綑邊線,點知接下來不斷遇上不能攀越的海崖,跳海係唯一出路。

如是者游後兩三記就去到呢個大Gap位,遠觀經已睇到入面亂石橫陳,似乎有一探既價值。

一路橫攀入內灣,抬頭望係崎嶇凹凸不平到極點的月球岩,無限水腳位可以肆意攀爬,但都係入峽吸引d。

黎到呢個位發現橫攀不能,付出誠意齊齊游入石峽。

峽旁有好積木既崖壁,幾好睇。

賞罷又齊齊橫攀出峽挑戰一下,十分有挑戰性的一段,好彩下面都有米幾水深,可以安心玩。

再來,又係三兩個不能攀越的直壁位,游吧…

有幾個泳渡位十分奇怪,兩岸明明好近,但一落水向下望竟係深不見底的墨綠色…不禁會引起莫明的恐懼,都係快快游過對岸好了…

不知多久,終於去到石澳的高球場,仲有越黎越近既大頭洲!今日既下半場!

加緊前進,呢個崖位十分騎呢,眼看有不知名水流自上方飛瀉下來,取道崖下棧道難免要照頭淋硬食,著實係令人卻步,於是嘗試上方繞過,但臨門一個關口卻被棘叢所阻,一個不小心會被棘叢推落崖下…

唉頂,最後都係把心一橫選走下路!可恨呀!越過崖下棧道,硬食飛泡沿石隙上攀。

在右方竟可亂入高球場,順手入內參觀參觀,小休一下。

返回海岸,在球場的一個內灣發現一個精彩的三叉洞!格局極好,但十分可惜地被垃圾與及腐肉吞噬左,嘩穿洞一記臭到暈。

離開水面太耐,都係落水游一記,順手洗洗身上的沙=_\=。

嘩石澳經已近在眼前啦,快步疾走埋最後一段平緩岩岸,中途又見到有荒廢了的機槍堡!幾有Feel。

花花即刻拔出點三八一根大耍造型照。

鶴咀山…幾好睇,但今日上既話應該會死十次。

最後終於在石澳後灘登陸…

沙灘盡頭又有一個機槍堡喎,差唔多唔玩lu。

原來諗住在石澳找間小店吃一個高茶,但有覺悟既隊員最後都係決定乾糧小休再KO埋大頭洲先食野!

好!下一站大頭洲,經過藍色石橋過去,見到有好多釣友。先由落花帶領玩一記石澳門迷陣,一座石堡壘入面有一T型走廊,都幾特別,但個人黎講都係鍾意大帽的石天門多D。

一登石頂,上OK,但落就十分嚇人,有個位需要一輕躍一記,但下面好那高,頂LUP水!!唔敢落!!被困呀!!最後一試在石峽中壁虎下降!好彩成功!全身而退!

好,開始逆時針大頭洲一圈,無限多手腳位的海岸,可以不斷攀爬,OVERHEAT就落水游游。

好快去到大頭洲東端,面對成個藍塘海峽!再附上宋崗及橫瀾島,太讚!東龍島南端成塊岩岸塗左做白色,唔知搞乜。事後隨公子報云那是民航處的傑作,人工白崖一塊,頗有地中海風情,值得一臨。

去到呢個位會見到下方小石排,嗯,十幾廿米落差加上風浪頗大,都係返山路越過算了…

在攀石場那邊再返回海岸,竟又有不能攀越的GAP位…夠了吧頂!!我要發火啦,跳海啦!!

落海一看又係漆黑一片的深淵…風浪頗大,沒有撘載泳鏡的花花出開始後勁不繼,慘被海浪弄了一陣子!

進入最後階段,到了今日最後一泳渡位,短短的數米水道,但向右一望有一極深海蝕隙,而且又可以一玩橫攀入洞!!

今日黎講真係攀到夠哂皮…最後以一記飛躍了結大頭洲。花子呈垂死狀,嘩我驚佢唔掂呀!

完成一圈慢步回石澳沙灘,遠觀五分洲,Coming soon 啦。最後的最後,三個爛掉的隊員背著行裝在石澳沙灘出現並意圖游出浮台,飽受其他泳客歧視…

2006年5月7日

返回上頁返回首頁返回頁頂

 

Email