海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖南灣頭洲

路線:淺水灣-南灣-頭洲-南灣-淺水灣

淺水灣集合,吃吃冰淇淋再起步,馬路步至南灣,閒綑南灣海岸至岬角連渡頭洲三島,環遊主島後原路撤回淺水灣完成。頭洲雖小,但地貌則十分豐富,真係麻雀雖少五臟俱全,連島沙堤、闊窄海蝕隙各一、卵石灘、石塔…加上有好多非必要趣味橫攀,絕對值得一玩。

隊員:Pui, Lok, Dino, ABC, Fa

 

淺水灣集合一個,本來直接在南灣集合會更佳,但落探員唯恐一眾港島盲會迷失於南區,所以都係約起淺水灣。

天氣極好的一天,海灘的mm指數頗高,觀摩一會再出發,路過dxx寺廟,好多遊客呢。

本想一路沿海灘綑到去南灣,但起步無耐經已被海邊一工程阻礙,收得皮,於是沿馬路快步至南灣。

在中灣沙灘看到防鯊的安全指引=_\=,嗯…呢個好重要…中途可以遠觀到今日既目標物「頭洲」,十分不俗的小島嶼!睇黎泳渡距離都唔係十分遠,十分好。

到達南灣!落探員為一眾隊員圖示解說一會既計劃路線,可謂準備充足。Briefing 完再動,沿南灣海邊前進。

初段有一石塔同一個荒廢建築物相對而立,幾有趣。

石塔可以一攀,直得黎幾多手位可以玩。

續行,發現腳邊有隻怪獸,細看下發現係海蛞蝓,哇醜樣到呢…

過埋建築物後就開始終極橫移段,好好玩!80%直壁一路橫攀至岬角,難度不高加上今日Friction 120%up,橫攀得好爽!

近尾段既海邊有好多海草,靚!依然係好有衝動落去全身捲住哂d海草。

好快到了盡頭,實在太興奮,邊走邊跳點知成部相機由個袋度跳左出黎,墮地直擊岩石,立時拾起初步檢查發現鏡頭重創,送院後不治=_\=就係咁三年既戰友光榮地戰死了,可惜唔可以比一個更轟烈既死法佢。

收拾心情再上路,商議一輪決定帶埋行裝過去放起第一個島仔,半島同第一島之相距只有兩三米,但係飛躍不能,都係要有全身入水之必要,最後使出接力技將全數裝備安全乾運過哂第一島。

登頂在草叢堆中收藏好行裝,見到有兩個釣友在島上垂釣,嗯…應該唔會發現我地既行裝既…好準備泳渡,今日黎講最遠係呢個位架啦,觀之大約有三四十米左右。

正想落水之際突然有兩個木獨外國朋友漂來,隊員落立即使出溝通技交個朋友,請邀對方順我地一程過去對岸,結果對方一口答應,實在係太好人!二人一艇拉住佢個船尾過去,兩條友終極阻水,係唔幫手蛙水,Feel到外國朋友都頂唔順後勁不繼。於是近岸就棄船同船夫Say個Bye就自食其力游埋岸,省回很多力氣,讚!睇黎外國朋友都怕左,好快就鼠走左,留下還未渡海的花子…要慢慢游過去。

先唔玩第二島,一陣返轉頭有時間先補完,去到二三島之間,竟發現有水中沙堤連結兩島,可以徒步涉水而行,出色!成功到達第三島擱淺起沙灘。

登岸的石灘後有一個極淺的海洞,合照一個後先順時針環島一圈呢∼

起步撻水一記,今年水性仲未醒覺,誠意有待改善。越過第一個海蝕隙一陣返轉頭先玩,行得無幾步到左第二個海蝕隙。

在這裡可以玩一記橫攀,下面Feel到起馬有兩三米深水。

我放棄橫攀跳海游水算數,其他隊員攀到盡發現前無去路,都係要跳海脫出。沿水道游入去發現極之寬敞,成個廣場咁款,登陸後攀上廣場門口的石塔,驟眼睇都有幾分龍樣,呀…就叫「龍首巖」啦。

繼續順時針前進,島端無乜景點,好快就轉返去廣場既另一面入口,呢有有一段幾有挑戰性既橫攀!開始個下降位最難,搵唔到一個良好既左腳位,同埋個壁有少許倒,搵唔到位就好快會無力。我嘗試一記後覺得有難度加上都幾高下就放棄左,到樂隊員同癲哥哥一試,結果二人分別以上路及下路成功突破,一舉攀到入廣場口,勁。

由呢面望過去「龍首嚴」仲有氣勢,個人覺得有d似西洋象棋隻馬。全員入內小休,在廣場正中央的石排上閒坐一會。

休息完繼續順時針綑邊,越過一個小型沙灘後就返到去第一個海蝕隙,兩個海蝕隙完全唔同feel,一個勁寬敞,一個就窄到變左一線天,從東面可以下攀石灘涉水步入,攀上中間的石堆,竟發現有個藍球!!太讚可以一玩造型照!

至於西面出口就必要一游,游出少少就可以爆上左壁再橫攀上頂,最後就返到去登岸的沙灘,徒步返回第二島。

今次由東岸回去,發現可以輕鬆步上島頂,仲有條標高柱起頂!意外既收獲!一登後就回到海邊準備泳渡多一記回去了,十分順利全隊返回第一島,取回今早收藏好的行裝,完好無缺,太好。最後極速沿路橫攀回南灣,再馬路暴走回淺水灣完成撘車閃人。

2006年4月23日

相關於記:

返回上頁返回首頁返回頁頂

 

Email