海岸探奇 Coast Trek

  海岸探奇目錄
  偷渡系列
   
   
   
   
   
   
  返回遊記目錄

 

嶼

地圖龍爪頭洲

聞說落隊員一探後回報稱之頭洲至春坎角一段的海岸亦是值得一遊,於是連同殿後樣及競競組隊一探,順手再渡頭洲精研一番,豈料由頭洲回程之時遇著漲潮海流,險象環生,幸好最後生還,上了寶貴的一課。

隊員:Pui, King, 殿後

 

晨早灣仔集合,購物後打巴入淺水灣起步。

本來打算穿過豪宅區下降南灣開始綑邊,但臨門一腳慘被食Q攔路,太可惡,一怒之下決定烈日登山一野就爆落去頭洲的海岬,真係未見官先打八十。

天氣極好既一天,這道山脊的風景十分不俗,遠望到赤柱半島甚至係鶴咀半島!路上有一個小石室,戰時遺蹟吧…

再來會有一兩個分叉路,其中一個應是下降龍爪岩的。唔理咁多快步下降至頭洲海岬,落到去得返半條人命,熱到溶咁滯=_\=。快手快腳做好防水裝置就跳海啦唔好等!黎講今次係競競零六年下水禮,祝佢好運啦。

十分冰涼的海水,但發覺今日水質頗差,海水呈泥黃色仲有極多雜質,水中既能見度少於一米,好差。快快手行去第一島盡處準備過第二島,短短30零米水道上次輕鬆過渡,今次零考慮就撲落水游過去,殿後一馬當先好快就搶灘第二島了,競競撘載了浮衣,行動極之緩慢地漂著過第二島,這時殿後突然呼叫話見到有條成個人咁大既魚起對出內灣撻水,但又睇唔清楚係乜野樣=_\=哇頂好兩驚,幸好最後都全員安全到達第二島,競競到上水之時都還不知道曾有巨魚出現既消息…嗯…無知都係一種幸福黎既。

不作停留過第三島,驚見二島之間沙堤盡現,一時驚愕!睇黎現在正值退定之時,太讚,總算無白費玩多一記頭洲。

輕輕鬆鬆漫步沙堤到達第三島,上次玩了順時針,所以今次就玩逆時針,水退了有更多的攀爬位可以玩。

先進入第一個海蝕隙,唔好等啦即刻搵返上次收藏好的籃球出黎玩造型照啦!


淺遊完後繼續逆時針綑,小沙灘後就可以進入廣場,今日水退顯得更加寬敞。

穿過廣場再綑去島端,在那裡大休午餐,殿後再一次在防水袋中取出熱呼呼的糯米雞…呀頂…大休的時候向南方遠望十里外既銀洲,突見一巨魚由海中躍起,空中翻騰半圈再插入海中,睇哂整個個程!真係魔鬼魚撻水!!太讚!!!

大休完了再一次回到廣場入口,上次橫攀失敗了今次再接再厲,細心觀察之下竟發現到真.腳指位,成功進入下路,尾段著地前一個換腳位十分好玩,成功感滿載!

穿過廣場由另一面繼續逆綑,哇點知一出去發現驚濤駭浪=_\=唔知做乜大浪左好多,十分嚇人,幸好游出一小段就有一個石台位可以登陸,但洗衣機模式下登陸都搞左好耐。

競競更被大浪拖爆了腳,上岸後橫攀一段始脫險,此時殿後已按捺不住一野游左過去。三人會合經沙堤返回第二島,準備泳渡回去。

話說殿後樣去到海邊已發現海流甚急,但競競零猶疑一野就飛撻左落水完全制止不了,二人在岸上看著競競懞然不知地被海流沖走左19幾里遠,真係驚佢唔掂,於是落水嘗試去追佢,但結果係連我自身難保,太高估自己既泳術同低估左d海流!!好彩靠防水袋既浮力吊住條命,唔係應該經已溺斃。

殿後則比較冷靜,嘗試向小艇上的漁民求助:「我個朋友被海流沖走左,可唔可以幫幫手執返佢埋黎?」但得到既答案係:「呢度好多鯊魚架!你地游快d啦!」之後駛走了船…=_\=…我…無言…幸好我同競競最後都燃燒僅存既能量死游到返岸,但就得返半條人命,二人在岸邊攤左3個字先回到氣,真係上左寶貴既一課。


攤一輪二人氣力回升至30%,雖然都仲係腳步浮浮,但可以繼續下半場龍爪。經過一段十分之平易近人既岩岸,好快就去到傳說中既龍爪岩,四五個海洞連發,中間有石脊相隔形成爪狀,倒是別緻。


要入洞可以挑戰一記橫攀,嘗試了一遍但手腳發軟頂唔緊都係放棄!!下方海面全是奶昔狀物,跌落去就開心死。

過龍爪後是一段海蝕平台,可以漫步一會,欣賞下左方既岩壁。

更發現「鯊魚上岸」石景。之後又有一兩個泳渡位,可以走在潮汐帶的小石排上。

見到落隊員玩既洞頂倒攀位,但今日下方水淺,接觸不能。

經過一巨型石塔,左折入一個眼形大洞,洞下全是卵石,三人又試攀入洞。

同競競先後安全攀入,但到殿後用同一個腳位既時候竟然踩爆腳位成個FreeFall左落水。

上岸觀察傷勢膝頭對落介走左一忽肉,血如潮水…

黎講今日都幾傷,士氣持續低迷。

雖然時間尚早,但三人一致通過快快手綑到去春坎角沙灘就收皮去食Tea=_\=。黎講最後一段都有少量石台石峽可賞。

於返到來春埳角,沙灘有淡水可以先沖個靚涼先,太好∼殿後更衣竟出動小蘿莉TSHIRT!太Damn!

泳綑活動主題曲《血如潮水》

主唱: 賊船死士 填詞: Mazzy

別問我為何要撻水 不在乎背囊裡 有沒有 dave

不記得要帶浮具 知道泳渡多半會死

游過海刺礁石 在我心裡海永遠是那麼美

既要泳渡 就不後悔 (就無怨無悔) 再多的苦我也願意背

我的血如潮水 怒濤潮水將我向石推 

手腳磨碎 血如潮水鯊將你我包圍

我再也不願見你突然被扯下水 不想癲的鯊魚見識你的美味 

我不知道會不會剩下肉碎 答應我你從此不在深水區徘徊 

不要輕易嚐試溺水的滋味 你可知道這樣會讓我 lup 水

相關於記:

2006年5月9日

返回上頁返回首頁返回頁頂

 

Email