 
＠在起步點檢查一下裝備，如果真係比賽既話大概已被先加左十幾個鐘。
＠起步後地圖都懶得睇，淨係係咁向南行…穿過左好多公公婆婆聚集既晨運地。
  
＠第一個檢查站係歌連臣山頂，直線進行經過墳場既無盡梯級，到達了引水道，地圖上有虛線可以接上歌連臣山山頂，但係周圍搵都唔係好覺眼…呢個時候有幾個好心既老人家指左我地入草叢，話「果度有路上山架，我前排行過，要落手落腳架。」就係咁開始左是日第一擊既林藝旅程…好采開始既時候有一隊爬左我地頭，幫我地開左一半路，擋左好多蛛網。
 
＠上到CP1，有個哥仔問「咦，你地好熟口面喎，你地係唔係有個網站架？」眾隊友第一時間斬釘截鐵咁回應「無Ｄ咁既事，認錯人啦！」ＸＤ。事後估計呢位仁兄應該就係隨心兄。
 
＠過左ＣＰ１之後就係全走龍脊，講左十年既路線，估唔到會起呢個情況下行…
＠龍脊原來都無乜野，初段全在林蔭中水平進行，後段景觀開揚，風景唔錯。
＠今日上午天氣唔錯，能見度亦佳，對岸既赤柱半島清楚可見，咁既天色行龍脊不俗。
 
＠再前進，看到腳下既石澳，五分洲十分有趣，好似一條肥蟲。越過第二個ＣＰ，開始下降土地灣，起路邊見到巨型亂石一堆，隨心一登。
 
＠大熱！落到土地灣完全唔理工作人員既指示第一時間飛撲落水降降溫。
 
＠呢個ＣＰ有一個任務就係要游出去離岸不遠既獨木舟度，起有救生衣既倩況之下當然係毫無難度可言。
 
＠水攻，前後夾擊意圖擊沉工作人員的艇！三人合作反佢艇！！海浴實在係太出色，一眾隊員完全無離開既意思，可惜幾唔願意都係要同大海暫別繼續上路。出發前沖番一個淡水浴，正！全員差足電繼續上路，太開心竟然唔記得打印…＝＿\＝
  
＠離開沙灘繼續山路之旅，頭先玩得太開心加上體溫回升，有Ｄ撻皮…一眾隊員竟然諗到暴走引水道呢個玩意！！太爽！全速前進！！
 
＠可謂玩盡了引水道旁既澗，因為大雨既關係，一路上遇到好多似模似樣既潭瀑。
  
＠消暑極佳，加插跳潭環節，估唔到路邊既潭仔都咁鬼深…
  
＠又一大瀑，又起呢度小休一會浸浸水。之後既引水道水量上升，越黎越難行，我地都係閃返上路度行。終極悶途既引水道，使用了極限既時速７Ｋ前進。
＠不消半小時到達下一個ＣＰ，由於剛剛在引水道遠望到大潭篤水塘竟然狂野地排洪，極好睇，於是報到之後決定繞一繞道先去一賞排洪中既堤壩。
 
 
＠水閘全開，成幅白布咁！靚！處理隊長忍唔住在左方叢林下攀至壩底影相。
  
＠十二點幾，都係時候開餐，就在壩下大休食野。午餐後處理隊長作出了一個極英明既決定「午睡半小時計劃」！！得到左充足既休息，差滿哂電先再起行！
 
＠經馬路返去剛剛既ＣＰ，由於太大水既關係大會取消左溯澗既環節，真係唔開心玩唔到激流既雙潭，但係傳聞感人今日黎左玩雙潭，希望佢地唔會被水沖走啦。改取山路去到下一個ＣＰ大潭水塘壩。呢個時候天色都仲係好好…
  
＠點知上大風坳既途中竟然落起暴雨來著…又雷暴又山泥傾瀉咁。上到大風坳小休時更發生了史無前例既驚險被困場面，話說小休既時候處理隊長去左殘廁好耐都唔見人，於是前往看個究竟，在門外呼喚，佢仲起入面，原來入面個門鎖爛左成個甩左出黎！！！太Shit 既被困。結果要門內外合力先可以開到門拯救出處理隊長！
 
＠繼續沿柏架山道離開，山既北面又天朗氣清，真係激死！去到下一個ＣＰ，得知仲有一個ＣＰ玩埋遊繩就可以收皮，太爽，可以落山食茶。至於呢個ＣＰ就要玩野外定向，不過好頹下，得四個Set 起路邊既爛鬼Check Point，好快搞掂。
  
＠最後一個ＣＰ－大石上玩遊繩，有一個義工既態度唔係幾好，算，我忍你。(但係估唔到３６正日又見返佢，態度依然係咁衰，忍唔住少左佢一野＝＿\＝)。遊繩呢一Part 應該係預左我地識架啦，完全乜都無講，幫我地扣好裝備就推左我地落懸崖。
 
＠岩岩落雨條繩濕左超重，好難遊。個死人崖又倒又濕＝＿＝總之就係惡搞。
 
＠好采最後四人都有驚無險落到黎，但係越早落黎越慘，係咁餵蚊！頂！
＠玩哂要行返上去大石上還返Ｄ裝備先可以繼續行，要經過一條超跣既爛泥路，起度食左阿樂一記虎尾腳，右半邊身爛哂！＝＿\＝！真係衰收尾！
 
＠好！完成！最後返出去市區領得測試日證書一張，隊長唔出席無得攞啦，就咁正式完成今日既行程。一眾隊員唔知係唔係唔夠喉，有車唔撘要行落去維園沖涼…著住對濕透既行山鞋大半日隻腳浸到爛哂…＝"＝
2005年6月26日 |
