返回特別企劃目錄
  返回遊記目錄

 

特別企劃

攀夫奇案

零六年度繼海馬攻略後重點活動第二擊,估唔到咁快就返黎覆桌,真係低估左癲哥哥既怨念。雖則吸收左上次既經驗,但心底裡依然係覺得呢個咁低能既玩意成功既機會都係不大的,仲差d想放一野鴿,好采最後都有出席!唔係就真係錯過左一登望夫石既機會!!

隊員:Dino, Pui, 鬼 Lok, Tong, Wai+2, Fa, 和, Toi

 

琴日玩完佇人右脊好那疲,又腳痛,原則上今日係應該放鴿的。攀夫行動06既集合時間為10點,起身既時候望下個鐘,11點…打比癲佬原來佢地岩岩行緊上山,既然為時未晚,再典多一陣等埋內子先上山會合一眾賊人。

好低能咁行錯路,行哂成條自然教育徑先兜到去望夫石…不過都好,可以影下唔同角度既望夫石。唔見石頂有人,睇黎隊友們都仲未Set到繩。

會合眾人,今日既天色一般,望夫石既遊人比之上次較少,可以任意拋繩。佢地仲起拋繩既步驟度徘徊,吸收左上次既經驗,今次決定引入魚絲同鉛垂等裝備,增加成功拋繩既機會。

拋繩既工作當然係由威力士操刀,經過多次嘗試及修正誤差,終於起14點既時候成功將繩索拋過石頂並在另一方收回。

好,立刻開始 Phase 2,癲哥哥在石底林間找到三棵健康樹Set 好繩。之後向今日既登頂隊員講解一下繩索的運用及一會攀登的安排。面對垂直甚於倒懸既望夫石,一眾賊友既土法攀爬技可以收皮,今次既行動睇黎要完全靠哂繩索之助!

至於繩索攀登既技術大至係「主繩加手、腰、腳連繫三普魯士結,呈毛蟲狀咁典上去」,即係世人稱之為「普魯士攀登」既方法!感覺上十分土法既攀登法,幾岩我地!

因為癲哥哥要幫其他隊友Set繩,所以由我先行上攀,嗯…=_\=又唔知上面乜料,一陣爬爬下上面有玻璃割繩就Happy。幾有趣既攀登方法,試多一兩次就熟手,但係每次既移動距離都好有限,因為影響速度既主因唔係技術,而係身高!!

開頭諗住石右面個壁都有八十幾度,好過左面倒懸,所以就爬右壁,大約典十零下就上到石頂邊,但係去到呢度先係最濕濟=_\=。小休一會影下下面班友仔。

話說去到呢個位由於主繩與岩石接觸,推繩結既方法經已行唔通,加上石上只有半隻腳位,一個右手位,而左方石台只有大半個身位,要攀上石台真係好棘手!經過多番轉換體位都未能成功,終於決定土法攀爬再動,將腳繩升盡再借力上半身撻上石台,再死典爛典上去!幾驚整穿件羽絨…=_\=

可謂破釜沈舟既一擊!Total搞左成半個鐘…好采最後終於脫險成功一登!!上到頂驚魂未定,都係第一時間A住自己先。再影返石底既隊員們!Yo!觀乎石底十分平緩,無乜異物會危害到繩索,十分好。但係發現頭先上攀之時後方既繩索根本就無受力,完全係靠哂繩索食死左起石頂既石縫既力…=_\=

下一位隊員樂,上攀之前將繩索移回石的中間位置,雖然上黎果時個壁係倒,借唔到力,但係可以避一避頭先右面果個濕濟位。

有繩之助倒壁都無乜問題,最長既樂隊員以驚人既速度上攀,還有空賣弄浮誇技。

上到頂都係同一問題,推唔到繩結,但今次可由我在上方接應,全力將隊員樂扯上頂,情況有如玩Trust Fall,信唔過對方都出唔到呢招。Nice~又上一個!

咁辛苦上頂都係為左踩下個仔個頭,呼喚下方隊員由沙田方向回影我地。

一登望夫石!雖然十分興奮,但係頭先既攀爬經已耗盡左精神力,上到頂都不敢造肆,比著平時經已連阿媽頭都KO埋。拜讀朱翁的香港掌故,得知佢曾設置左一個留名簿在石頂,可惜已經搵唔到,只在石縫中找到幾塊生秀鐵片。

裝備有限,每次只可以兩名隊員登頂,由於在下有二級攀岩失格既資歷,所以留在石頂協助隊員設置遊繩下降系統(大家果然信得過隊友XD),由隊員樂先遊繩下降,下降之前二人不斷研究及改正八字扣的設置…呼∼此舉無情地擊沉隊員樂既信心,再加上甚麼發現繩索丕口,不受力等等,竟然可以拜見到隊員樂R底之姿!足足企在起崖邊三個字都唔肯死落去!Yo∼太癲!

經過多番嘗試終於都肯死落去,係第一下繩索受力被拉長跣落左幾十厘米,之後都好順利閃電般遊左落石底!成為上落完成第一人,真係要同隊友擁抱一番。之後就到隊友威上攀。

亦係最擔心既一個!眾人都聚精會神留意佢既舉動。可幸無驚無險就上到黎石頂邊,都係被硬拉上頂。

又一成功上攀,阿威上左黎一陣,影左張相就好快咁要落返去,由於太心急既關係,第一野下降就失去平衡成個人坐在直壁上,股壁相擊還發出巨響,嚇得隊友們心都離一離,以為阿威又Freefall,下方Belay的癲哥哥連忙收繩。

好不容易回復正常姿勢,但發現保險用的普魯士結在剛剛阿威失位既時候索實哂條主繩,搞到而家唔上唔落情況十分惡劣,雖然我在上方嘗試幫佢解結,但係普魯士結正在受力狀態,根本就解唔到!!身上又無小刀,如果唔係都可以割繩一Hit!此時隊員樂竟有驚人提議,就係找回剛剛石頂的生秀鐵片割繩!太癲!即做!!數一二三割繩,阿威成功脫困,好快咁就遊左落底!十分好!真係要感謝朱翁有靈!!!

由於天色已漸沉,其他隊友唯有下一次再戰,先讓癲哥哥一登望夫石!一了其多年黎既心願。

對於癲哥哥既技術大家都好放心,十分順利咁上到頂,上到黎天都已黑齊了。留下癲哥哥獨個兒在石頂感動。

我就先行下降,點知今次又發生狀況!普魯士結又搞出事,但今次係落到一半既時候賴野!吊在半空唔上唔落,隊員又幫唔到手!但係有左頭先既經驗,都係生秀鐵片再一次出場既時間,癲哥哥將鐵片一分為二同我一人一半,準備一陣佢自已賴野時都有得用,再由上方用繩將一半鐵片運到我的手上,使出凌空割繩技=_\=,錯手割錯主繩就開心死。

成功下降之後就輪到最後既癲哥哥脫出,條友起上面搞左成半年都唔捨得落黎,原來起上面織繩圈…死仔,頭先又唔見你織比我地用…咁安全當然係好順利咁完成下降啦。

搞掂!玩到入哂黑,太癲既攀夫行動,完完全全咁突破左土法,亦成為最驚險的活動,諗返其實技術上都幾安全,但係自己友Set野硬係信唔過,信心下降70%。不過最後都順利完成到行動,真係多得癲哥哥同咁多位隊員既合作!至於未上頂既隊員放心,有機會一定會再搞!必定全力十撲!

2006年1月8日

返回上頁返回首頁返回頁頂