＠單車出九龍最直接既方法都係大埔公路，但係呢排起緊唔知咩隧道，攪到周圍d路七國咁亂，好彩暉暉平日都行呢條路番學，唔係行錯路畀d大貨櫃掂一掂都唔掂！
 
＠又係極速落深水埗，但係今次唔落brake喇，由佢去到最盡，費事攪到塞車就唔好啦~鴨記買電，拿拿臨出發！
 
＠出左深水埗就開始我既盲點，完全唔識路，屈肌，李暉帶算吧！由欽州街轉通州街再入到太子道西既起點，等燈影下相先，之後就可以一條大直路去到啟德…
 
＠太爽，差唔多見燈過燈，十分鐘左右就到左啟德範圍喇，九龍真係細！經過條古怪隧道之後就可以直入機場政府大樓隔離條路。
  ＠兩邊都係停車場，但又無咩車，成排大樹幾有feel……中間仲要有條行人斑馬線。
 
＠好奇怪，機場都摺左十年，應該就無人用架啦，但係四盞路燈仲閃下閃下，好有被遺棄既feel~.~唔理，玩下波波先……  
＠再入就已經進入無燈地帶，但係九龍實在太光，唔開車頭燈都無問題……玩下光吧！過埋座有d爛車迫向到既建築物之後，就可以一聞全港最臭既渠，啟德明渠，真係臭到暈，影張合照，閃！
 
＠出番大路就會發現到座有玻璃瞭望台既白色神秘建築物，聽聞李暉試過潛入，但係激多蚊，放棄左，今次主菜又唔係佢，所以都係下次啦。除左臭d之外，明渠夜景都唔錯既，黎講。
 
＠無人既啟德實在太爽，任踩唔嬲……幾野就到左九巴車廠出面，迫晒d熱狗係度，應該係放棄晒，打晒交叉，咁o徙野架，畀架我玩下就正喇！
 
 
＠過跑道橋，一個字「闊」，同青馬果d差唔多，飛機用既真係唔同d……左轉就進入正式既跑道，可以去高球場，右轉就無咩野睇，不過可以玩潛入卸泥區，今日探奇，點都要去一去既！
 
＠海邊吹吹水，飲下野，就開始潛入……其實好簡單，卸泥區得塊圍板隔住，抬住部單行一段仔海邊就入到去，耶~成功！
 
＠後面維港景，影下剪影都好好feel！亂入亂出，竟然無事，可以順利出番跑道，一條大直路就到高爾夫球場既出面咧。諗住入去應該有d麻煩，點知又係非常潛入friendly，得d矮樹隔住，無難度！聽聞上次有架車跌落海死人之後，個高球場無人幫襯，結果荒廢了，咁就梗係唔好o徙野，畀我地踩下單車你話幾好呀！沿途都好多釣友向到夜釣，睇黎呢度已經開發緊=_=
 
＠因為太肚餓，影下相就閃人，臨走前仲探左探以前既舊機場消防局，不過太黑，又放棄左，next time吧啦！出九龍城碼頭去土瓜灣搵左間老麥食個遲來的晚餐…
 
＠走既路線係亞皆老街出旺角接彌敦道再接大埔道，正呀，一嘗兩個心願，一係旺角踩單車，二係o係彌敦道同d巴士鬥快，掂呀！
 
＠經大埔道落番大圍，途中因為唔想踩行人路，太煩，落左馬路踩，但係o係咁畀d車boo我地，我少，我地去到盡架啦，應該有60幾k，其實已經超左速，d車仲想快過我地，少丫！唔怪得知大埔道咁多人抄車！！！ 2006年10月24日 |
