返回特別企劃目錄
  返回遊記目錄

 

King
特別企劃

西部單車拾遺之旅

話說上次西部單車之旅因為太遲出發既關係,無時間去南生圍欣賞下當地魚塘同桉樹叢既美景,親落左成個禮拜既雨識得停下,就拿拿聲飛奔去啦!路線更加入多年前 plan 過既麥徑第九段,可以講完左多年心願。五點大埔出發,徑元朗入大棠再沿麥徑九段到荃錦坳,引水道至城水,全長 66.7 公里。

隊員:暉、競

 

例牌既嘉道理斜,涼亭合照,影到爛,下次應該都唔會再影=_=||
極速三十分鐘到達南生圍豪華公廁,但係臭左好多!

一入到橫水渡個渡頭仔,就見到船家叔叔係對面落船番屋企,唯有叫番佢過黎,仲要上埋單車都係每位照收五元,真係唔話得!雖然短短兩分鐘船程,但係就好 feel 到爆!

過到對面岸過埋隔離碼頭影下相,同樣好 feel!再加插梳化合照,贏左!

差唔多日落,拿拿林踩入去魚塘區影下相。休閒環節,雖然係泥路,但係一樣好踩,加埋周圍既美境,唔洗講野,慢慢享受!

去到傳說中既小小渡頭,唔知點解好多玫瑰花瓣散落於此,應該係剛剛有人影相既道具,不過唔理喇,有人預備左個咁好既場景畀我地,梗係又享受下啦!

合照完就閃人,點知沿泥路踩出去唔接馬路,可以在無敵大草原上飛馳,一路踩一路睇住日落,成為今日最精彩一環!最後踩到草原盡頭條路畀人封左,唯有上番馬路。順便去埋山貝河邊睇下,其實都唔可以叫做河,D泥好似成米厚,踩左落去又係開心死…

兜晒成條南生圍路,出番青山公路,就入元朗市中心食個飯。點知踩得太快,一落個駁位,成支車頭燈飛左出黎,散左=_\=!最 shit係連暉暉支鴨記廿八蚊LED都唔知點解死埋,今期真係大檸樂,今晚被逼進行黑夜計劃!無燈既關係,係元朗市區入面唔敢亂咁黎,一見差佬就即刻彈落車,真無癮。極速踩去人煙稀少既大棠,唯有。

沿大棠道遇見頭文字 low b 版,有條友係咁來回飛車,當我地呢D單車無到,小下佢!過左漁護署管理站就開始無街燈,黑夜計劃正式開始!好彩條路新鋪,夠白,仲可以用時速三十幾K落吉慶橋。之後就食屎,成條麥徑係咁上,上足四百米!

過左田夫仔無耐,唔知做乜條路越行越多石,仲要越黎越大舊,最後多到踩唔到,又無燈唔知前面係乜,行行下腳下面成層泥,大鑊,原來係山泥傾瀉,面積有廿米乘五米,成個人咁高,最難係D泥係浮既,梗食都要過,暉暉隻鞋就畀 d 泥食左,最後成腳成車都係屎 ~_~凸…奇差既感覺,成腳濕泥又無水!!

好彩最後一段都係落多,去到荃錦坳第一時間沖去廁所到洗腳,洗足十五分鐘。辛苦後係有補賞既,由差唔多五百米既荃錦坳,沿荃錦公路極速飄移到引水道入口,落足三百米。可能因為荃錦公路下段山泥傾瀉封左,全程無車同我地爭路,因此錄得當日最高速度60km/h,太爽!引水道都幾悶,初段都有 d 夜景睇下。

去到城水坳位,諗住行番上次條路,點知畀十多隻窮兇極惡既大否圍,被逼入左去城水避難,唔係一定身首異處!決定上行鉛礦坳返大埔,可能先頭驚惶過度,兩個鷇繚t中仍然高速前進,半個鐘到達鉛礦坳,太恐佈喇!

最後經大埔滘落大埔公路,九分鐘飛馳至太和,準時一點番歸。玩完!訓!

2005年8月23日

返回上頁返回首頁返回頁頂