返回特別企劃目錄
  返回遊記目錄

 

特別企劃

獨木舟一星班

先是第一次因暴雨腰斬、再因夾時間既問題一拖再拖,活動前一天更意圖再次更改活動日,但因教練已落了訂租艇既關係唯有臨時拉伕湊足人數上堂…還好是日天朗氣清,簡直係玩水既大好日子!!籌備已久既獨木舟課程幾經波折終於成功上到一星班啦!

教練:法蘭奇
學員:Pui, Dino, Fa, Kai, 費林, 豺狼, 狗比, 巧兒

 

十分準時既九點集合,人齊後由Frankie 帶入上課既地點麗都灣,此灣癲哥哥極力推薦,說甚麼青馬汀九景色絕讚云云,到頭來咪又係因為地點近佢!超!

落車步行幾分鐘就去到姜布J二號小屋仔,在那裡先由教練大人解釋一下…唔記得解釋乜野!?=_\=,之後兩人一組搬哂D艇出去海灘一字排開。

後面既汀九青馬景真係唔錯,加上極藍天白雲!讚!

準備好哂艇、浮衣等裝備之後再做一陣簡單既熱身。好!著助浮衣準備落水!

由於極大浪既關係,上艇呢一個咁簡單既動作都搞左一大輪,每次一隻腳踏上艇上就會有大浪一野打埋黎搞到全隊人仰馬翻,又或者上左艇但係比浪連人帶艇打返埋岸擱淺,極之好玩!真係要以快打慢,在浪與浪之間既空檔極速上艇爬出海。

好!出發,剛剛 Frankie 已經在岸上示範左一次握槳、前進同後退既方法,係時候練習一下。

當聽到哨子聲響起既時候就要第一時間爬埋去浮波度列隊。最慢果個係罰架!一眾隊員為左阻止其他人先到步,使出左各式各樣既茅招!

結果最後由隊員楷包艇…

1212花式散艇法十分有趣,之後都唔記得教過乜啦,總之就係四維爬啦。

十二點零鐘Lunch Break,食飽飯無事做又周圍行影下相。

麗都灣風景真係唔錯,設施都好新淨下。見到椰樹同瞭望台,癲哥哥又忍唔住一攀。

傳說中既比賽艇,但係都係唔知有乜特別同埋同其他艇有乜分別。

……=_\=。麗都灣既水質,真係恕我直言,係屎水黎…
下午開場無耐竟有特發事件,有一班攝影友帶住幾個比堅尼MM影相!太出色!之後白衣MM仲過黎借艇影相,點可以唔乘機影返一兩張!!

下午再繼續課程,教授了急停挑釁、全方位轉向、控制性CAP艇等技巧。
練習既時候,癲佬同費林雙雙弄掉了眼鏡,起呢個清澈度10既地方係無可能搵到…

教練見我地咁好學,教多我地幾樣野,包括CAP艇復活技、海中上艇技,上圖狗比示範海中上艇失敗左,變成非控制性CAP艇。

之後玩左一個兵捉賊既遊戲,被老屈埋一角,被捕後更被無情擊沉。個人CAP艇次數三次,成為全隊之冠。

玩完遊戲就慢慢爬返去泳灘果面準備洗艇。

洗艇真係極花工夫同時間既程序,唔小心射左D沖涼聹G入船倉…洗極都好多泡…
最後搬返好D艇就完場,歡樂既時光好快就過去。

獨木舟出海真係超好Feel,但係都Feel到如果咁既技術出海應該會返唔到黎…努力練習!!希望快d夾到時間上埋二三星!

2005年6月11日

相關連結:

返回上頁返回首頁返回頁頂