返回特別企劃目錄
  返回遊記目錄

 

特別企劃

古浪聚

得到雨仔同學既協助,成功開辦搞左兩年都搞唔成既獨木舟三星班,仲要係以一個谷底友情價開班!西貢上堂!唔使再挨馬灣d垃圾水!!真係要多謝你!雖則個阿Sir係冷左d…

學員:Pui, 鬼, King, 費林, 公主, abc, 威, Dino+7

 

第一日


晨早西貢早餐後就齊齊打的入烈士紀念碑下面個AYP水上活動中心,一到步就入錯左成班人去左隔離屋=_=真樣衰,都係要雨仔出黎迎接我地黎講。

去到第一時間要報個靚到同埋…叫飯…小屋內斷估都迫左三十人,場面都頗為混亂,搞掂哂d野收拾埋行裝後終於可以開始上堂,領取了助浮衣後就由偉華仔帶走左我地,先黎熱一個身,之後就教前後掌法等等,一時之間手腳不協調,要摸一輪先搞得掂…

學完掌法就齊齊落去搬艇準備入戲玉,但落水之前阿偉華仔都要交下貨係咁2介紹返條船個構造,好鍾意佢問我地反艇後點分船頭船尾果野,一眾學員討論一大輪後開估答案「係無分別的」…yo

落水前又唔知做乜學員大洗牌,將我地洗左入去其他組度,就係咁我地幾個入左龍仔果組,學習完上落艇終於可以自由活動爬出海,不過大約五分鐘左右就被吹雞叫左返黎,但係唔識轉彎既鬼學員只係一路向前爬返唔到埋岸,最後要教練出手拉返埋黎=_\=

返到黎又學下cap艇同搬艇咁又係時候Lunch了,尋寶時間,各人要在無數既飯盒當中找回自己那一盒。

阿龍仔sir要挨杯麵黎講真慘。仲要介紹返公主既全方位防哂mask同競學員既ii造型,咁既裝束玩北海渡應會被槍殺。

食飽飯抖一抖又要開始下午既課程啦,黎講其實兩日上哂三星好似幾趕咁。繼續由龍仔同偉華仔執教,真係好,睇隔離冷雷果組既同學…唉灰。

下午既課程包括急停、掃掌、船尾舵飄移、艇排既運用等,黎講教練讓我地示範左艇排最大既作用,梗係造型影相啦,至於果d咩野急救、換艇呀、煮食呀果dFunction可以忘記左佢架啦。至於船尾舵亦係一個幾出色既玩意,可以令船以飄移既動作入彎,但係未習慣Lock艇就胡亂使出既話只會落得cap艇既下場。

十分之輕鬆咁完成左第一日既課程,完場前返到石灘泡浸降溫一下。阿龍仔sir似乎十分之高興,力邀公主同佢拍一攝寫真,演出十分之投入。

第一Day臨走之時阿冷Sir竟然話聽日要調轉組教,咁唔掂喎,由於太唔捨得偉華仔,公主唯有同佢講「如果聽日唔係你教既話,你d寫真相好可能會出現起GayStation,一陣有乜人黎指名要你教就唔係咁好啦。」唔知呢班友仔乜料既偉華仔,果刻個心應該涼左一截XD。

第二日


今次分開兩組人各自入去,船員組十分準時地集合九點鐘就入到去活動中心。

快人一步果然有so,可以好快咁完成點名叫飯收拾行裝等程序,之後快快手做埋熱身就可以落灘搬哂d輕艇先XD。黎講今日我地無比人斬件了,成班友仔一組咁上堂,Happy。

一開始以為可以逃離冷Sir既魔掌,點知都係走唔甩,等到癲加組黎埋就一齊聽佢訓示。黎講我個人幾鍾意佢既拖鞋教學法,講解都幾清晰,但比起阿威猶有過之既冷語冷語真係令人吃不消…=_\=

今day上午先學多次船尾舵,因為有部份人琴日未學黎講,之後仲有重點項目HI同X救艇技。紙上談兵一輪終於開始實戰,阿大偉華SIR先黎測試下大家極爛既甩尾技術,睇黎大家都仲未能夠掌握果一下強而有力既掃掌…甩尾既時候後方的半空竟然出現傳說中既Halo!讚!

甩完尾就開始救艇環節,一時之間大家都沉到時等待隊友既救援,救艇真係幾好玩,但呢個玩意耗力甚巨,玩多兩次真係會撻皮。同埋叉差放水既時候個艇倉成日凹鬼哂啪啪聲咁,我真係驚佢唔掂。

大休午餐後開始下午課程,主打係「壓水式平衡」,主要用途係起cap艇既時候力挽狂攔。

學習既方法係要我地先將輕艇變哂潛水艇先,哇個艇倉入滿水真係好難平衡,可以不停練習使出「壓水式平衡」。之後唔理咁多,艇頭沉到插左落泥底都強行前進爆返出深水區,組成潛水艇排!好惡!

黎講課程都上得八八九九,最後大偉華Sir帶領我地轉一個黃宜。


紅樹林小休、穿橋底、航道巨浪…感覺十分之不俗,為兩Day既三星賊船活動寫上一個完美既句號。

就這樣完成了三星的獨木舟班,十分之期待黎緊既輕艇探島活動!!

2006年7月1日及2日

相關連結:

返回上頁返回首頁返回頁頂