返回特別企劃目錄
  返回遊記目錄

 

特別企劃

地圖挑戰三六

參加挑戰三六,真係一個突發事件,自毅行及山霸後窮人玩法,真係要謝絕一切籌期活動。但係呢鑊搞既挑戰三六,由於上年搞到一鑊泡,又山洪又失縱又病咁,所以今年唔夠隊玩。St. Elmo誠邀我地出席是次活動,更得知挑戰三六唔係單純既行山活動,仲有好多其他環節如遊繩、爬艇踩單車咁,十分吸引,於是就決定組隊參加!

隊長:King
隊員:Pui, Lok, 鬼, Fa

 

集齊五人眾出隊,對於是次活動都算係幾有心,竟然每人俾多五草玩測試日一心諗住熟悉一下比賽既流程。由於是日既成績唔錯,一眾隊員竟有在比賽正日爭勝之心。

之後最大既問題除左預備裝備之外,就係改名啦!一眾賊人啟動垃圾記憶體,不斷拋出無數既廢名包括「浮船碎片」、「鬼咁敬佩,落花無情」,更有為假設勝出而設的「退出左」、「取消資格」及最後既隊名「OH…SHIP!」。


比賽正日

大會話要七點鐘去到東涌,哇靠!大拿拿要成五點幾起身,天未光就出門口真陰功。
早到都未有巴士撘,要亡命出九龍轉地鐵,再一次同阿樂上演一幕在同一車箱通電話既爛場面。越接近東涌,車箱同月台上越多橙色衫既物體,比賽氣氛越濃,更見一隊黃衣夜鷹人出現,唉敝,無勝算…=_\=,決定爭標無望既話就全程閒遊玩耍。

在東薈城外的廣場集齊全隊人及支援隊總指揮St. Elmo後,跟大隊人流去到比賽既起點位置,第一件要做既事就係報到同係咁易檢查左一下裝備,之後就自由活動等起步。

大會真周到,竟然一早就請參賽者食蕉,D蕉仲好生下,睇黎要放入背囊焗佢半日先食得。未食得住唯有玩住先。

等起步全員鬆懈周圍搵野玩同影相。St. Elmo之頭目-邦Sir,對本隊裝備十分好奇。

ClockMan造型。           機械人造型吸引左記者小姐過黎訪問。

大會後期在裝備名單加入左個人裝備-手錶一只,由於花花家貧無手錶呢d奢侈品,竟然諗到用鬧鐘加橡根黎自製手錶,實在係係太出色既作品,其後在賽事中途,其磑虧洶熂鬖b隊員大休睡覺之時更發揮左莫大既作用。

隨後更發現單車頭盔組件一件,簡直係一個蝙蝠形既眼罩!!一眾無聊既隊員輪住黎試,又玩得一大爛餐。之後更有花花既美式足球手造型!

正當我地玩得興起既時候,遠處起步點突然傳來一陣起哄之聲,原來賽事已經開始左,掛住玩連起步都唔知=_\=…全員立刻執拾行裝起步,在出發點發現下一個CP既位置。哦∼原來係橋底,但係對一對地圖,點解人群全部都向反方向行架啦,唔通睇錯圖!?正當全員都十分懊惱之際,邦Sir過來問我地做乜唔行,還告知我地第一段唔使睇圖照指定路線行就得架啦∼=_\=OH…SHIP!!

就係咁起步之時竟然係最後果幾隊出發!太癲!!起步又後依著工作人員的指示在行人路和馬路上繞來繞去,大致係想分開大隊間既距離,好讓下一個CP踩單車人流無咁多方便處理。一路上其餘隊伍都好守秩序咁一隊跟一隊行,完全無爬頭既意識,所以我地都一路壓守龍尾…中途仲見到Connie!!!真係差D唔記得佢!!

第一個CP之後就係踩單車,開始以為淨係頹踩馬路,點知之後兜左入去一塊爛地度踩左個圈,仲有一個位要衝落一塊碎石坡,幾好既越野Feel!

荒漠行車其間,有山路核彈王之稱既隊長突然唔見左,原來佢架戰車起荒漠脆低左,腳踏連埋支臂成條甩左!!於是佢要求工作人員換一架車,但係唔知點解工作人員唔肯換!?真奇怪!最後隊長竟然使出秘傳絕活,隨手執一舊石頭將腳踏搥返好繼續行程!搞到手掌爆哂血!勁!!去到CP2好彩有寶礦力派下一下火!Nice!

CP2之後就係去梅窩既山路,上一個星期六黎過一次Pretrip,非常熟路。天氣實在係大熱,像赤道重疊。去到近山頂處既涼亭小休一會兼出動涼鞋計劃!隊員樂露出秘密武器:銀紅相間指甲油,十分閃!!真係見者都為之氣餒…

繼續上路,好快去到CP3,竟然要起呢度玩野外定向。一開始接到定向紙,大伙兒都無乜玩定向既經驗,真係有D中汒無頭緒,連起點同第一個Check Point都分唔到,第二個Check Point 仲打錯印,好彩好快就知錯能改,其後大致有左概念,搵之後既Check Point 都好順利,中途更見到隔離隊有MM隊員!NICE!

接近中午,天氣越黎越熱,HP下降70%。玩完野外定向就大路落梅窩,再遇支援隊總指揮St. Elmo大人。梅窩海灘呢一個CP係玩爬艇仔,出海繞個圈之後爬返黎咁啦,由於四人力道唔係咁協調,成日都原地在轉,幾經調教終於掌握到個節奏,最好更水中發力超越左一隊公開組!好玩!

完成埋岸果時梗係唔少得要唔小心跌落水一Hit 降一降溫,浸完海水再去隔離沖一沖淡水!冰極!!HP全滿但呈失溫症狀,繼續上路之前隊長更請了全員汽水一Hit。咻矰銢藥_裝雀檸溝可樂溝雪碧邊走邊飲實在太爽。

下一站已經係貝澳對上既十塱坳,我地決定唔行馬路,沿海邊既平緩小徑推進,路線既高度落差較少,更可以順手欣賞一下芝麻灣既景色。經過熱沙地獄…差點變成枯骨。

幾經辛苦到達十塱新村,向村民借用左一下水源再使出降溫計劃!!全身濕透由頭Cool到落腳!!出色!!隨後有一小隊經過,我地亦誠邀佢地一齊降一降溫,但係佢地係咁易淋左兩野就話就快到CP好快咁跑左去,結果之後在CP前馬路見到佢地有一位成員老抽…可惜可惜。

十塱坳CP之後就係去老人山一舊大石玩遊繩,呢段亦係全日最辛若既一段,地面溫度相信有40度,連迎面吹黎既風都係熱風!需要定時灌溉降一降溫,唔係中暑都似。

天色極佳下既老人山崖壁!好好睇,但係已經熱到撻哂皮,仲要少量林藝一段上攀大石頂,好惡頂!!

上頂仲未好多人,經工作人員講解一輪再幫我地配戴好裝備就逐個放我地遊落去。雖然號稱有五條繩,但係工作人員好似唔多夠,只係開左其中三條,一隊人只以用一條逐個遊落黎。隊員對於遊繩呢家野實在係無乜概念,好采都唔係搞左好耐就全員落哂黎。

完成遊繩經過神之領域撤回大路,中途見到另一青年組,其中女隊員十分友善,兩隊人在中心吹左一陣水,得知佢地原來係第11名,咦?我地幾時爬到咁前既位置架呢?

大路繼續前進,去到下一個CP工作人員竟然告知我地現在進駐左第四位!唔係呀話!?但係距離前一隊成45分鐘…要我地呢班撻皮友仔發力追龍簡直妄想,由呢個時候開始,全員都Feel到爭標無望了,啟動閒遊比賽模式。再來就到左海邊CP。

呢個CP要玩跳碼頭,跳海之後要游泳五十米左右返埋去岸邊,連埋行裝都要全身入水計劃!可惡!但係都無計要全員使出誠意撻水計劃。入到水極舒服!!清涼到呢!!

雖有助浮衣之助,但係不諳水性既隊長同隊員鬼水中移動速度暴慢,最後更出推拖拉船計劃,一人一個連行裝拉埋返埋岸。

游泳途中隊員樂不察水淺,膝頭被水底礁石界爆了,傷口頗深露,需要即時進行急救包扎一番!完成急救後執拾行裝再起行,半數隊員的背囊陷入嚴重水浸狀態,有部份隊員手機更加光榮地戰死在海戰中。

繼行,向支援點貝澳沙灘進發,時間已經四時多,話時話好似未食Lunch,差d餓死起芝麻灣半島…會合支援隊之前先要玩兩個無聊任務,第一個係傳說中既渡河,都已經全身入水,渡一條水深及膝既小河又有何難。之後團隊任務要將一個穿洞水桶入滿水,使出禁斷秘術「真.麻包袋技」半分鐘唔使KO左水桶男。

Mission Complete!會合St. Elmo大人!開餐之前先替隊員樂再處理處理個傷口一番。
下午茶除左有精緻既三文字之外,更有大西瓜一整個!!真係多謝哂各位既支援!!但係太大個西瓜,食左一半就頂唔順…=_\=好飽。

休息既時候老人山既方向出現直升機既縱影!?事後得知原來係遊繩CP的義工中暑需要救援,酷熱天氣之下守在暴哂既山頭難怪會出事,真係辛苦哂D義工。

休息到唔想走,但係在St. Elmo一再鼓勵之下終於再次起程,但係左行左幾步發現竟然留低左地圖起支援點!!!太出色既DQ計劃!!

下個CP貝澳沙灘尾,原來係要玩綑邊,敝!心諗一陣仲要行青龍,再唔快D就要夜溯,好麻煩!此站的義工幾好傾,發現左隊員樂既閃銀腳甲便好奇一問,創造輕鬆愉快既氣氛!更派左一個特別任務比我地,要我地將信物交至CP14的工作人員手中。本來打算退出既我地受到如此既委託,唯有繼續上路。再行之時一義工女孩子張手於面前,還以為她要臨別來一個擁抱XD,原來係此路不通,要我地行下路…

綑邊路段十分短,一會便到達青龍下游,講左十年都未行既澗,估唔到比賽既時候會玩到,仲未入黑!行快兩步,好彩今次只係溯下游到引水道完成,使出極速推進,估唔到青龍既下游都幾好玩,澗道開揚,水潭疊起,仲有一橫攀位同一直岩位幾有挑戰性。

好快去到引水道,到達CP14,隊長將受委託之物件交比工作人員,為左答謝我地竟然請我地食冰極菠蘿片!!太感動既一刻,真係要即場唱一句「我愛妳,愛著妳!」

之後天色黑齊,在引水道終極悶途暴走。途中有一奇怪人物尾行,嚇鼠,以為係II。達到之後臨上長屻石前既CP,工作人員又請食芝士腸!真開心,食飽就好上路!

上長屻石一段又係一開始就係咁扯上去,惡搞,要一路上到四百米先平衡橫山腰過伯公坳。落伯公坳途中見到對面上大東山的路上有數盞燈光,應該就係第三位既青年隊。

到達伯公坳,咁既時份在伯公坳,真係難免令人想起當年大東迷失一役…
淨係見到邦Sir,St. Elmo仲未到著,決定全體大休睡眠計劃!小休數分鐘還未入睡St. Elmo大人經已連同補給物資到達!太出色既夜茶計劃!仲有冰陣汽水!!飲飽食醉最岩就係黎一個大覺睏,決定全員睧睡半小時。再由隊員ClockMan出動鬧鐘計時警報。

快樂既時光過得特別快,半小時火速過去,讓我長睡下去可以嗎?但係起ClockMan同St. Elmo既威迫之下一眾隊員都係要依依不捨咁離開伯公坳典上大東山。唔知係入夜天氣涼快左定係我地抖夠,上大東無想像中咁大撻,上到近頂既位置發現四野黑景之清實屬罕見,決定小休睇風景一會,途中被一公開組超越了。

下一個CP係爛頭營18號,哎呀!竟然唔係15號,真係唔開心。起呢度又要玩團隊遊戲,要用七巧版砌個隊號,出動中國數目字計劃輕鬆完成。

再之後…黃龍坑菠蘿蓋地獄,簡直係掉落左二千二百級既深淵,死典爛典行到落去馬路,雙腳不停打電報,唯有攤在馬路中間休息一會。之前一隊公開組仲作隊係咁跑左落去,相信雙腳唯有切除一途。

但係估唔到我地只係剛剛到左地獄既門檻,下一個CP竟然話比我地知要夜降黃龍坑…下游!?竟然最後先搵條咁既屎渠黎玩,唔係咁大鑊呀!?但係到左如斯既田地唯有頂硬,此後簡直有如行屍走肉,在此段荒澗中搞左好耐,又芒草又死水,總之就係惡搞,其間在澗中發現一罕見人體工學大岩石,再一次全員陷入睧睡狀態!本來只係想小睡三個字,最後竟然一睏就係45分鐘!出色!!經此一睡精神回復不少,終於完成了黃龍下游,豈料之後又加插林藝環節!?幸好一眾隊員訓練有數,最後到達最後一個CP,又再估唔到要遊多一次繩下降護土牆,呢次感覺輕鬆多了,順利完成。

本來在伯公坳預計三點就可以返到黎終點,點知最後搞到成六點天光先返到黎。到達終點工作人員都睏哂覺,都難怪既,幸好有兩名義工好人肯起身幫我地拉Banner 比我地衝線!太好∼唔使自己拉。過終點後就被點去Check裝備。

花花顯示出其驚人的裝備,後備食糧500g旺旺仙貝及變身ClockMan用既鐘形手錶。

日出前讓賽事終結,終於搞掂,青年組第四名衝線,成績算係咁啦。由於太早既關係東涌都仲未有早餐食,於是全體隊員就拖著爛掉既軀殼各自回老巢休養生息…


點知!?

當睏到矇矇矓矓之際,打開電話一看,竟然聽到阿樂既留言,出現左戲劇性既逆轉,話我地無啦啦得到第三名!?由於全數隊員都關上電話跌落左沉睡既深淵,結果只有阿樂一人連同支援隊總指揮St. Elmo及邦Sir出席頌獎禮。

但係真係估唔到無啦啦咁都有得贏。在頒獎禮上,真係從司儀口中講出左一早設計好既台詞:「團隊挑戰36青年挑戰組季軍係…OH…SHIP!」。但係司儀可能比個名嚇親,最後出黎變左「OH…SHIPSSSSS!」哎呀!好想聽呀!!心諗當時如果改既係「退出左」或者「取消資格」應該會同樣出色!!

又見昨天出發前訪問我地既記者小姐,今次亦訪問左隊員樂,但係聽聞對答極之行貨,話甚麼「都幾辛苦、我地都有諗過退出架、好彩最後都刻服左」云云…太ShiPsss。

頌獎禮就此告一段落,之後…


一眾隊員最關心既梗係獎品既問題!!!太出色既不勞而獲!!過兩日阿樂就同隊長一齊去接收獎品!

季軍獎品包括:獎座、Osprey背囊、SIGG水壺、GP超霸充電器、Montrail快乾防曬帽、Nikko 斜肩小袋、Blurr 銀包、中華白海豚生態觀賞…每人一Set!!!!!

由於可以順利完成是次既比賽,支援隊總指揮St. Elmo實在係功不可沒,於是花花特意將其Osprey背囊贈與St. Elmo以示感激,一眾隊員都十分讚成,於是獎杯決定由花花管有以補償。唉,真係唔抵得,花花有得Keep獎杯真係好。仲唔止,花花仲可以得到中華白海豚生態觀賞門票五張,可以一日之內睇五次白海豚或者一個人坐五個位,好威!

慶功晚宴!!任食老邊計劃!!乾杯!!!!!!!!

TC36,Mission CompleteD。

2005年7月16-17日

返回上頁返回首頁返回頁頂