溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

Pui
澗

地圖石壟仔坑

石壟仔坑源起昂坪,流經石壟仔廢村後與茅坪坑匯流於梅子林。石壟仔坑澗道短少但十分精華,全程只有初段需要涉水行進,之後澗道開揚,可於梅子林遠觀的主打景點「石壟仔飛瀑」,親臨其下觀之份外宏偉!實在係五星推介既好澗,最適合半日閒遊!

隊員:Pui, Fa

 

呢期約人好似越黎越難,成日都係二三人小組探遊。起呢個咁好天既下午竟然都係得花花一個戰友。唔緊要!!二人少探石壟仔短澗十分可行!一點富安食住等,發現左一間極之出色既餐廳,日式肥牛雞聊飯連凍飲都係30蚊有找,太出色!

人齊出發,無可避免地要走段悶途馬路上梅子林。馬路盡頭接村徑,行兩步見橋入澗。先走一段茅坪坑下游,下游十分平緩,踩單車遊覽亦無問題。

望番出面大堤壩前的水潭,倒影幾靚,果個潭入面住左好多龜,不過唔夠薑游出去。

茅坪下游一段須涉水前行,呢一段十分平緩,林蔭瞞天,但澗道廣闊,感覺唔差。行無耐左面出現支流!?細看再對一對圖估計係引水道,繼續行。話說前兩日競競亦連同費林一訪石壟仔坑,但係佢地行錯路去左茅坪上游,所以恥笑完佢地之後自己都要小心D睇路,唔好重蹈佢地覆轍。

路過一小石堤,之後澗道左右開源,左為石壟仔坑,右為茅坪坑主源,茅坪坑有一新鮮搶眼的紅絲帶掛著,一個唔小心真係會諗都唔諗走左果面XD。進入石壟仔坑,再越過一段林蔭澗道就會變得開揚多了,先有一兩個小瀑。

掛住影相睇風景,先開紀錄乃野一Hit,一手渣落條棘藤度,橫切三條手指。此澗之後都有少量呢類玩意,D藤真係睇清楚先好用。再行兩步見到第一個潭,無落水玩唔知幾深,潭後接左右兩條短瀑,上方空出一片天,有D坐井觀天Feel。

閒遊玩法瀑左正路繞上頂,續行又一水潭,水較深但四圍林木茂盛,頗寒不宜泳。
有小水道可一玩閘水,但係效果一般。

一路上溯,就算林蔭段都頗開揚光猛,陽光從葉間透入澗中,感覺好清新!

澗道上又現短瀑一雙,上行之時發現路中有一長形壺穴好似鞋印,幾有趣。
澗道一旁的樹木結著很多鮮紅果子,靚。

長形水潭,後接一綿長流瀑,但係澗道左轉唔可以同佢地黎個合照。越過水潭後可以沿瀑右岩石拾級而上,亦可一試激攀流瀑。

瀑頂有多條小瀑匯流,好景!真係要起度小休一會影下相。

再動,澗道先右後左轉向,抬頭一望發現原已到達石壟仔瀑!!近睇真係好癲!強烈推薦下午時份遊覽石壟仔坑,陽光將瀑壁變成鮮橙色,順光觀賞石壟仔瀑大約靚十倍!

完全係一塊巨壁!瀑疊三層依著左壁瀉下!圖中上方可見花花在瀑頂作為比例太宏偉既巨壁瀑!感覺上只有雙鹿藏幽先有呢一個Feel!有機會一定要大雨後再訪,一睹巨壁全滿之態!

瀑底怒拍造形照加食梨大休賞瀑。瀑壁頗平滑加上間歇性青苔陷阱,正壁挑釁唔係醒目仔玩法,一嘗沿瀑攀上第二層,但係過唔到第三層。

都係典返去瀑左既石脊。攀此石脊反而幾好好玩,手腳位極多之餘仲可以居高臨下觀賞流瀑!

瀑頂發現閘水天險,但要冒死進行=_\=一個唔小心會比水流由瀑頂拋落谷底。
瀑頂視野極佳,可以遠觀雷婆石景。

過石壟仔瀑後又再一次進入林蔭澗道,陽光從背後照遍澗道,感覺原始而不陰森,特別!應該係進入左石壟仔廢村既範圍,澗旁有荒廢的建築物。澗道右邊二度出現支流,可以極速出澗接上石壟仔村的古道,但係建議再走一段玩埋樹根先走!


中游出澗位之前有一棵大樹,樹根盤據澗旁的亂石,可以借樹根之力肆意攀爬。

最後澗道與山徑交接,右面可以經茅坪出梅子林,左面就可以經石壟仔村返梅子林或者上鹿巢山。出澗時四點幾,諗住同阿花一遊鹿巢石林,所以擇左方退路,一路跟住大路行進,間中都幾密要捐下草叢。

去到廢村心藏地帶有分叉路唔知係唔係上鹿巢山,但係都成五點幾,都係放棄計劃落山收工。山路最後竟然返反去梅子林的堤壩,有趣!又識得一條新路!!

2005年9月10日

返回上頁返回首頁返回頁頂

 

Email