溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

澗

地圖紫潭石澗41

紫潭1-1X號坑,源起紫羅蘭山流入大潭中水塘,其中7撘11號坑最多人玩,港島的澗甚少涉獵,期望呢條稍有人氣既路線會有別於港島坑澗既人工氣色,抱著一探無防既心情前往一遊,可惜事與願違…=_\=

隊員:Pui, Fa, Wai, Wo

 

放工,兩點中環集合。由地膽阿威及和仔帶路,撘車前往淺水灣。

淺水灣落車,先落沙灘行個圈差差電…= =+ 視察一輪後不捨地死返上馬路。大方向淺水灣坳前進,在馬路盡頭接上崎嶇山路一條直線移動接上引水道。

在引水道左轉步行三數分鐘便到達淺水灣坳,起港島方向概念下降70%,好低能咁行錯路去左右邊。行到去三號坑先發現唔對路=_\=,中途仲加插泥漿混戰。商議後決定放棄7號坑,由看似可行既4號坑下降塘再上11號坑。

極濕滑既澗,道甫一入澗和哥哥宣佈戰死首先逃脫,相約大潭篤水塘壩會合後就此作別,其他隊員繼續沿呢條臭坑下降,十分短既路線,堪稱零景觀,係行三數分鐘後到左一個短崖位,有個爛瀑布。

在崖的右邊(下降方向)下扳,手腳位充足但十分濕滑,唔覺意一跣就FreeFall.com,但係隊員花都係冒死玩左一野掛蠟鴨,死仔…落到黎發現澗旁的岩石上有水泥造成既「真.腳位」,之後上返11號坑每逢險位都有類似設施協助。

話咁快到達水塘,離開坑渠實在太好,小休一會就沿左方岸邊綑去11號坑,開頭見到水塘咁滿都驚無路行,好采林入面搵到條小路。中途經過計畫中既7號坑下游出口,有一塊OK高既瀑布。

再繞一圈到達11號坑下游,深綠色既水塘十分平靜,呢個應該係今日全程最好既景觀…在水塘已經可以遠距離望到澗口既高瀑。

澗口大瀑,水量微弱,形態還好,整體黎講要學公主講一句「唔係我杯茶」。瀑下水潭水色墨綠,感覺怪異,唔係好想玩水,隨便浸下腳影一陣相就閃人。

攀爬此瀑反而幾好玩,在瀑左稍為乾既岩脊上攀,手腳位OK但要睇跣。上到中段左面鼠入林再攀一塊碎石短壁後,沿泥坡走可接瀑頂。回望水塘,幾鐘意果種綠色。

行兩步又有高瀑阻路,瀑分兩層呈Z型。唔知正路起邊,各自搵食。阿威刻服墮崖陰影首先由瀑左上攀,我同阿花覺得頗險,嘗試由中路踏較乾身既岩石上攀,中路係有少少濕壁惡搞D,只要死抓住D石米仔典上去就OK。另一面阿威去到第二層發現過唔到條瀑,極驚佢會Replay墮崖一幕,幸好佢都學乖左慢慢黎,最後屈左林繞上頂脫險。

之後都係濕壁弱水瀑布,阿威再一次被困要由隊員花出手相助。中後段又有一個惡崖擋路,可以由右路繞過,但係花子突然狂性大發怒爆左路上攀,近頂處要懸空抓碎石壁、短草幾米=_=,幸好最後無事。

到達引水道出澗位,只係一路之隔,上源已經係超級大水=_\=可惡。由於只玩左兩條臭渠心有不甘,雖然已經五點幾.但都決定暴走引水道去一玩雙潭!!順手睇下見唔見到迷失左既和哥哥。

都幾遠既路…行左幾個字去到大潭水塘,又係爆滿了。落去大潭壩睇睇,排洪中…

十分出色既水幕!但係行多兩步睇一睇,雙潭變成激流,上都還好,落澗真係無乜信心,仲要得返唔夠一個鐘入黑,都係放棄計劃,影完相大路閃人出大潭篤大壩。竟然搵到和哥哥,我地搞左成四五個鐘…估唔到佢仲起度等緊我地!太癲!之後再約埋Dina出黎一齊去旺角食左餐貴夾唔飽既Dinner。

2005年8月27日

 

返回上頁返回首頁返回頁頂

 

Email