溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

澗

地圖鳳大南坑

文字七一週年賊船活動,話說當年今日由癲哥哥帶隊,38度既酷熱天氣下迷失於大欖腹地,差d全隊熱死起果頭。所以,今日週年既週年活動係可以咱艙P乃野。今日既天氣由本身預告既天晴變左做有一兩陣雷暴,不祥之兆…

今日既行程原定係上鳳大南坑,落鳳東飛流同鳳大北坑,最後只能夠回完鳳大南坑一段,真係好切合一貫既作風。

隊員:Pui, 鬼, Lok, Fa+1, Tong, 特倫斯, 公, Kona, 釗, 強尼, 威

 

九點鐘東涌大家樂食住等,例牌既遲到行動,買埋野食剛剛好集齊10人,兩架的士先入長沙玩水。

入到長沙,發現大型沙堤一條,沿沙堤跣落去好玩!仲可以玩沙堤攻防戰!阿樂阿花表演由沙堤頂飛躍而下,結果係花花跳唔過跌左落河…

天陰陰咁,好采都頗熱可以落水玩,長沙既海水含沙量達96.7%,水中能見度係 0。

但係水唔清唔緊要,可以玩浪,極大浪既一日,最岩同巨浪玩遊戲!!可以玩逐浪、破浪、撲浪!!

最勁既浪有成個人咁高!強,玩破浪用肩頭撞浪,好痛!!又可以換個玩法,等巨浪剛到,撲上浪頭到順勢一齊沖返埋岸,讚!!但勢估唔到起玩浪既同時,眼鏡再一次戰死了,離唔開七一咀咒…眼鏡被巨浪吞噬了,起能見度零既海水中已經無可能搵得返。

不諳水性既阿鬼硬食巨浪失敗被沖回岸邊…

玩浪玩到疲,返沙灘玩堆沙遊戲,沙雕虎喵!另一邊箱Kona 已全身被活埋…

玩左個幾鐘,遲到組隊員棠同釗終於到步,等佢地玩多兩Hit巨浪遊戲就起程離開。

鳳大南坑既入口就起沙灘後方,有一支極似針筒既物體為記認,先同阿花執一劑先。可能因為馬路果頭有工事,初段十足一條沙澗,無耐就會穿過一橋底。

過橋後澗道十分開揚,巨石累累,唔知係唔係人工架呢。

未幾進入一小峽,左方有一直壁,發現第一個小潭小瀑,但係真係太細毫無意欲落水。數步之外的穿洞遊戲反宜更加吸引。

又有野睇,一潭三瀑,上方三條水匯流為一經一斜板壁流入下方的水潭,唔錯。

決定在此小休嬉水一會。大伙兒水渡至潭後挑戰斜壁登陸,壁左有「半真.手位」,借力極佳,可惜手短既Kona使用不能,要死典爛典先上到黎,隊員棠更沿壁自由下降了一Hit…

陸路可以從潭右上攀,潭頂又有另一個別緻的長方形水潭。過水潭後進入了一個三面環壁的死胡筒,有一小瀑從左方流下,隊員樂嘗試由瀑左借樹根之力上攀,登頂後發現難度頗高,其他隊員唯有另覓出路。

在右邊近叢林的位置上攀,呢一面亦有一定難度,隊員棠嘗試中間另開一邊,攀爬時跣了一野製造驚險鏡頭。全員安全登頂,又發現另一口大潭。

繼續上路,之後有好多巨石要攀越,未康復既隊員威攀爬時弄爆了傷口,血流不止,Peter仔應該好開心,可以有一餐咁豐富既生日大餐。

越過巨石區就會去到引水道馬路,這時隊員強尼同雷文早退,係一個明智既決定。

過馬路後再次入澗,水量暴升,要全員橫越呢一段激流都花d工夫。

三層人工瀑布。                 大斜瀑。

之後突然間落起大雨黎,呢排都係鐘意搞d咁既野…成班人走入叢林度避一避雨先。
全體整理一下裝備準備濕身計劃,等到雨勢漸收就再起行。

探洞遊戲二,只有頭過到,身過唔到。 探洞遊戲三,十星,洞上激流全滿。

驚喜!又有瀑睇,呢個真係唔錯!平時應該可以在左壁攀上此瀑,但係今日咁大水難度十足,經隊員樂打量過後,決定在瀑右打林繞上頂…=_\=

上到瀑頂係一頗開揚的位置,正好適合大休,呢個時候已經成四點鐘,估唔到短短既1K澗道會搞左咁耐,仲要係無乜大休嬉戲既情況之下…

在大休之地後方再有發現,比之前的更出色,竟然有一左右雙瀑藏於後方的疏林之中,一探之下發現流勢十分過份,左瀑為主瀑,是兩層寬瀑,中間接中小潭,右方一條流勢較弱,流水沿岩壁徐徐而下。

睇完瀑係時候返去整野食,搞到成四五點先開餐,餓死。今日黎到先知得阿樂帶左一個頭,但係又無帶火機,我無帶爐但又帶左火機,唔係既話是但無一樣都可以收工,全員餓死起嶼南…

食食下野唔對路,睇住舊雨雲由長沙果頭飄埋黎!好睇!!過無耐就真係落起雨黎!

雨中開爐都係第一次,要開遮護住個爐!再加埋冰凍哈密瓜暴寒計劃!精彩!!

玩皮,能量偵測儀。         ………

大休左成兩個鐘,臨離開之際後方竟然出現彩虹!出色!

差唔多七點先離開現場,要上剛剛提及的那一個雙瀑似乎頗兇險,於是決定在瀑前靠右打林上山。由於剛剛特倫斯要早退,已經同阿樂先行殺出了一條血路及餵飽哂路上既蚊子,到我地行既時候已經開揚了不少,但係依然好差…還好同荊棘搏鬥既時候有d螢火蟲仔睇下,最後由馬路旁殺返出黎,全隊帶著爛掉既身軀慢慢沿東涌道典返東涌…

2005年7月1日

返回上頁返回首頁返回頁頂

 

Email