溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

澗

地圖青龍之傳承

青龍上游澗勢A升,全程需要大量攀爬,頗具挑戰性。景觀方面絕對無令人失望,精華集中於下半場,青龍峽青龍壁起一連串極惡巨構式危崖瀑布接踵而至,逼力氣勢之強只可以用霸道黎形容!

隊員:Pui, Lok, Wai, Fa

 

事隔一星期載入save point,半天輕取青龍上段,兩點伯公坳集合會合落探員後正式起程。

沿南大嶼郊遊徑直取青龍上段入口。途經上次小休獵影位置時作了地毯式搜索,但都係搵唔返我副新泳鏡…真係唔開心=_\=。

急走半小時到達青龍澗口,熱到攬雀尾,呢個時候可以用帽子裝水玩背脊骨落,咁就會…好凍架啦…

降溫到失溫再起步,澗右沿壁進入,好快遇到一個小斜瀑壁,試圖左壁攀上,結果…入澗唔夠五分鐘,我宣佈被困…士氣大增!!得落探員出腳相助成功脫險,繼續上路。

又好快澗道似進入了一個死胡同,左右兩個濕壁零上攀可行性,睇住要回頭兩步抄19林路既時候,落探員抬頭發現瀑壁中央位置的深深處透出一線生機,猛然醒悟呢個就係傳中既龍窟。

正面突破之必要,沿流水石級攀入龍穴,再穿洞而出,洞口剛好可以人袋合一穿過,大塊頭就要先分體行動了。

越過龍窟瀑後,回首一望可以見到下鬼頭石立於澗右的山坡上,頗有氣勢,但要一登既話要誠意滿分先做得到。接著的澗道只有一兩個無甚睇頭既短瀑,加上巨石疊起攀爬頗為費力。


納悶之際澗道景觀忽然一新,驚覺進入了青龍峽,一塊丹壁橫置於澗右一路向上伸延,流水依壁而走在峽峪盡處右折,這時整幅青龍壁霸絕登場!一幅過廿幾三十米企壁,一雙大小石台左右對立,再加中央一抹飛流,如此巨構式的景觀相信只有藏幽萬丈可以匹敵!

午後的陽光更把青龍半壁照得微紅,睇落特別醒神,唯一不足就係唔夠水,睇黎有再臨既必要。

唔單止景觀一絕,要越過青龍壁亦頗具挑戰性,由大塊頭領軍取道瀑左攀岩而上,手腳位充足但高度絕對俾到壓力你。

過青龍壁後靚景仍然一浪接一浪,先有一個中型流瀑可以攀玩。

再來便是由上鬼頭石構成的一度峽門,此地景觀比之青龍壁亦係不遑多讓!

由鬼頭石下方石棧道上攀越過此門,有興可以輕鬆一登上鬼頭石。

全條上游A升到呢度終於都收工,青龍擺尾後變成了friendly平流小溪,仲附送兩三個清澈小潭過佢洗一洗身,讚。

一路左傾諗住溯盡到天池,但最後實在不忍繼續草莽坑道,沿山坡小路離開,點知一出澗就發現再溯多10米便到達天池∼yo~

700米有個咁巨大既泳池確係好屌=_\=,十分期望可以一會全滿天池,兩米水深無限助跑撻水之可能!但今次呢…乾左兩三個星期水質同水量都係不敢恭維架啦,但在這個全港唯一既高山湖邊休息看看雀鳥低飛飲水亦係一樂事。


聯想集團會議開左成個鐘終於肯散會閃人…由爛頭營九號旁邊鼠返出黎,之後經過爛頭營18號,聽講係下星期既營地咁就順手參觀一下。

最後鳳徑落伯公坳撤退當然係唯一既選擇啦∼

相關遊記:

2007年9月8日

返回上頁返回首頁返回頁頂

 

Email