溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

澗

地圖蓮深石澗

位置頗為偏遠的一系列石澗,陸路接近要先走東大古道比佢殺8K=_=!所以時至今日才第一次踏足,但山長水遠入到去並唔係玩九大昂深,而係隔離名氣較遜的蓮深石澗…原定計畫蓮深三澗之中會連遊左下源接中源上西蓮花塔,結果中段行錯路,連右源都半探埋!

隊員: Lok, King, Pui, abc

 

十點東涌起步。

沿東涌灣海岸進發,中途穿村一度放甩了a先生,遺棄隊員悲劇續集,結果要在侯王廟等候執返佢。

接走東大古道,曾經計劃過綑沙螺灣一段的海岸,但結果當然係放棄左,6k推進打發悶途,過熱既情況十分岩重,定時灌溉之必要!

進度十分良好,1230入到深屈士多,大休撚貓咬麵嘆可樂∼

一點再起步,時間頗充裕,商議過後決定下源入澗,一探埋蓮深左澗的巨壁。

在澗右林區覓路入澗,少量遊林避不了,成功進入左源,上溯五步左右經已發現被樹叢遮蔽著的左源分支入口,幸而穿過一小段叢林又回復開揚,中段只有一兩個小潭小瀑可以泡浸一下。

好快就去到左源主打既巨壁之下,嗯…完全不能接近的濕壁,再加一道人工石壆打橫界開左塊壁,嗯…個人評價一般。

賞壁過後,左源到此經已玩完,在壁左覓路離開,離澗的路可真濕滯,一個斜壁險位,一段80度碎泥坡,搞左一輪先安全脫出。

先行既落競登上了左邊的小石峰頂,視野應該不俗,可以俯瞰左源全貌。

會合後下降到石澗的儲水口,泡浸降溫之必要!眼睇呢一條支澗的澗道都幾寬闊,好似有一遊既價值。

浸完水沿引水道前進,轉個靚彎抬頭一望就見到山頂碩大無朋的蓮花石塔了。

去到澗口水壩發現十分好水,昂深下源都feel唔到水質有乜問題!唔錯!望都唔望沿昂深左面一源切入,澗道比想像中平淡,只有些亂石堆砌的短瀑,上上下發現唔多對路,澗道開始右折慢慢偏離蓮花塔!好有可能入錯澗∼

於是商議一輪決定先返回澗口水壩位,去到澗口發現我地果然係入錯左右源,在旁邊的草叢見到中源的入口,上攀石壁、穿過引水道,到達真正的入口,原來剛剛有山路引入黎=_=

再次入澗,行無耐經已出現七八米高的中型一線瀑布,瀑右長了許些豬籠草,瀑下還有長條小潭可以公浸浴。

在瀑右可以輕鬆翻上瀑頂,登上瀑頂石台可以眺望外面的山峪。

之後又是一塊中型瀑壁,左邊一道主瀑;右邊則是流水散落而下,觀察一輪都未有定論應攀左邊還是右邊,但見左瀑旁邊設置了一道繩索,應該是正路吧。

於是落探員和競競試著沿瀑左上攀,但經多番嘗試都係去到瀑布中段便行人止步,手腳位被流水阻擋加上身體頗為外露,都係搏唔過。說時遲那時快A先生經已由右路上攀至瀑頂大叫「影我啦」=_=好啦右路跟隊。

瀑頂小休享受下水力按摩食個梨咁。繼行,路旁一座崩塌的巨大岩石,可以穿過它與牆壁之間形成的通道。

再來亦有一兩個中瀑可賞,在跌水潭中看到一隻落難漂流著的絲網,看來大去之期不遠矣,為牠留下一張遺照吧。至於瀑布,起水量不足既情況之下唯有加D人工修飾…

去到澗道的後段,主角果然是最後才會登場…

在臨出澗的位置澗道異壁突起,這是一道略帶飛流之態的寬闊瀑壁。

要攀越此瀑大概在右邊比較好爬,當然鍾意挑戰難度既,都可以學下A先生選走左路,橫越濕壁攀爬而上。

登上瀑頂便是離澗位,在澗右找到隱約的草叢小路引上蓮花塔。由這邊望上去蓮塔著實係無乜料到。

但登上蓮花塔後景觀大不同,最搶眼莫過於對峪那道長到離哂譜既昂深飛流!清晰可見三層大瀑布之姿!惡到呢!

除了觀瀑,蓮花塔對著蓮深中源那邊亦有石台石峽可以攀玩,而且背後懸空之勢甚惡,確實係影造型照既好地方,但係飛躍就真係玩唔過,一有風就fREEfALL.COM。石台上渣攤大休,坐著任勁風吹乾身上澗水,爽!

時間1730,係時候閃人,落探員電聯sT.eLMO打探下今晚燒烤情報,得知天氣好轉節目照原定計劃進行!


為左唔會遲到太多同埋節省點車費既關係,我地決定殺過去昂平吊車路再用45分鐘暴走落東涌,成功趕得切參加燒烤活動,仲可以加料燒埋我地果對唔砍掉都唔掂既腳。

2006年9月2日

返回上頁返回首頁返回頁頂

 

Email