溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

落探員
澗

地圖馬夾崙坑

路線:馬夾崙坑>馬夾崙>雞公山>鐵矢山

馬夾崙,位於雞公山東北,從雞公山望過去只是一個密林小尖峰,是以遲遲未去,一遊之後,發現此山實在精彩絕倫,無負奇峰之名。

隊員:癲哥哥, 落探員

 

馬夾崙之行講左都起碼半年,今次終於同癲哥哥二人同遊。一路行吹下水,發現原來除左第一次金山坑之外就未再試過二人行動,真係唔講都醒唔起!

一輪馬路熱身就到澗口,一入澗…唔,果然似渠,樣甚衰。但行多幾步……嘩!靠!實在係太恐怖既岩壁,是為迴音三壁之首,亦為全澗最惡一關。

如非知道可以上攀,我真係唔敢去掂呢塊壁,極直,極暴露而且高,跌得死人!塊壁斷估都十幾米,越野雄心班朋友佢地左中右都爬到,我就唔掂咧,我一心想沿兩壁的夾角位直上,起碼無咁暴露…但上到一半「壁中小樹的位置」就賴野了,直上我實在無把握,只好橫移,如是者數下攀升,我的身體完全暴露在空氣中,所謂手位係手指頭一節深少少,所謂腳位係三角形小岩角,只能放一兩隻腳趾上去,鰫O度,我深深咁嘆左一口氣,感到一絲後悔,雖然技術上我完全無問題,但個人覺得此壁實在兇險,如果無繩,將來再臨我會由左面山路繞過此壁。

癲哥哥可能聽到我話險到有d後悔,更加小心翼翼,上頂後佢話唔係太難,但心理上真係幾凝重,每一步都有兩個手位先敢上。之後是迴音第二壁,不能攀的濕壁,山路上一樣唔易,小心。

再之後就回復渠般的陰森澗道。如要穿馬夾崙雙峰間的斷頸就要離澗右上接馬夾崙石河,但我地Miss左入口,只好橫移,馬夾崙d樹木石塊全部碎到飛起,都唔明點解咁爛,小心呀。

到左斷頸底,精彩得不得了!竟然係一個馬蹄形的壁底,穿過壁口,是三面環壁的死胡同!佈局實在令人驚噗,更神奇係竟然真有迴聲之效!你面向此壁大叫,約一秒後後方竟然會傳來十分清淅的迴音!迴音谷之名實在名副其實,令人驚嘆大自然的神奇!

在此死地,只有全力翻越那數人高的極碎直壁,就算一開始迴音第一壁你行山路避開,呢塊碎壁係上斷頸位必經之途,所以此澗難度一定要企硬4,5粒星,唔夠經驗唔好試呀!

馬夾崙上風光無限,上雞公之途亦十分輕鬆,我和癲哥哥都對此短而精彩的馬夾崙坑旅程感到十分滿意∼之後見時間尚早,暴走一登鐵矢山,風景不俗,但南下之路非常碎斜,疲∼

2006年1月6日

返回上頁返回首頁返回頁頂

 

Email