溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

Pui
澗

黃涌石澗

黃涌石澗,由黃牛山流入蠔涌谷,全澗藏於林蔭之中,初段全是平緩澗道,如果唔係有激流玩應該都幾悶,直至去到尾段先會有潭瀑可賞。

本來諗住雨後玩下呢條聞名已久既黃涌石澗!入澗時遇到十分狂野既激流驚喜十足,一路都好地地一邊玩水一邊行,點知去到長廊潭,估唔到又有大鑊野發生…

隊員:Pui, Lok, Tong, 鬼, Kona, Sandar, Wai

 

十點彩虹集合,阿棠又使出遲到計劃…頂!隊員Sandar中了計著左波鞋黎溯澗,結果要購入白飯魚一對。

彩虹撘小巴入西貢,個車站搬左去另一邊。在蠔涌落車,跟住條水沿馬路行入去,中途經過一間車公廟及廢置電視台…

水渠下有兩隻極騎呢既鴨,有隻唔知做乜表演金鴨獨立,仲要收埋個頭起對翼入面…

再路過高球場就去到入澗的大橋位。在旁邊欄杆鼠落去橋底,發現極大水。

有山洪從左方湧至,一開波就要黎一個水深及腰,太過份。好彩我同隊員樂都作好左全身暑假既準備。

唔想濕身住既女隊員就起右方抄小路入澗,但須先親親蛛網一Hit。

又一次激流旅程,水量可以與昨天既馬西相提並論,但係更加清澈!出色!

閘水計劃徹徹底底咁敗北,一座落去就已經全滿,完全阻擋唔到狂野既水流!

由於水漲船高既關係,可以落腳既石位少之又少,全員採用澗水前進計劃。嘗試在走右源分叉位一探傳說中位於大腦上洋既瀑布,但係少探一會後不果,放棄∼

沿路撤退再返回左方主源。初段進度緩慢,差唔多用左成兩個鐘才去到第一個瀑布。

極大水,需要借助右方樹根之助上攀。

第一個瀑布,高七八米左右,打橫散開四五條水咁落,幾好睇。終於有景!感動!

第一時間鼠去瀑布下面玩一野先。   隊員樂就先上瀑頂回影返落黎。

唔知幾時阿威已經沿右方既瀑布爬緊上去,真係要少一少佢,無啦啦走去攀瀑,雖然跌落黎最多都係爛哂,但係已經睇到上方既隊員樂眼都定埋,不時要教一教路。

其他隊員則由瀑右的山路繞上瀑頂,瀑頂便是另長廊潭。格局極之別緻,隊員Kona躍躍欲試,第一個跳落水強襲瀑布。隊員樂則沿潭左橫攀向瀑布進發,其他隊員則由潭右上方的山路越過長廊潭。

就起呢個時候就出事啦!!阿威原本應該跟著阿樂沿潭畔橫攀,唔知做乜佢越爬越高上左潭左上方既碎泥崖,之後更引發一連串既落石驚魂,險些擊斃下方橫攀中既隊員樂。下方既隊員見狀都快速脫離險地攀上瀑布。

一眾隊員怒少阿威,但係見佢越爬越出,都係先勸阻佢攀返入林,但係佢死都唔聽,眾隊員唯有掉低一句「少,由你死啦!」轉身便走。點知一轉身就聽到Kona大叫,回頭一望,看到的已是阿威與一巨石凌空跌下來的影像,那是一個定格左既畫面,果時乜都聽唔到。到左有返反應時候已經係阿樂叫幫手!

阿樂第一時間爬返落潭將阿威拉返埋潭邊的石上,後來趕到先將其行裝運返岸邊,再計畫二人合力將阿威拉返埋岸。但係阿威報稱自己唔郁得,丫頂,直昇機系列05第二擊,現場唔係好收到電話,由阿樂在旁陪住阿威,我就走上人參瀑果頭較開揚既位置打電話求援。

先後動員了大批救援人員,由上中下三路黎救阿威呢條人粉。我就快步出麥徑接應救援隊伍,出到大路既時候已經見到直昇機到達了,在上方盤旋,不久後從救援人員口中得知飛行服務隊既人員已經接觸到大隊,但係都擔心起林蔭中可唔可以安全吊走阿威。

帶領消防隊伍返去會合大隊,仲有一個明報既記者哥哥跟埋黎,真係有專業精神。返到去既時候已經見到救援人員正準備吊走阿威,見到直昇機慢慢下降,四周既樹葉全數被捲走,成條澗即時開揚哂,就這樣救援人員連同阿威就一同穿過樹枝被吊走了…

隨住阿威既離去,救援行動亦告一段落,前前後後加埋搞左成三個鐘,真係辛苦哂咁多位救援人員,消防員哥哥仲要蝕左一件防火大衣比阿威,真係萬二分既感激。我地承諾會返去再教育阿威呢個人。

告別左救援隊伍後,我地就繼續行程往黃泥頭方向進發,路過石芽背,見個天幾靚又差唔多日落決定上去抖一抖休息一下。發現阿棠野外露出…佢本人強調係泳褲黎,翌日睇報紙亦發現佢既露出相片,太吊。

在石芽背小休,本來想睇日落,可惜雖然天色唔錯,但係太陽比雲霞遮哂。

一眾隊員已經完完全全咁忘記左阿威呢個隊員,十分輕鬆愉快咁落廣源食晚飯,仲不斷討論等阿威出院點樣屈佢請一餐,食飽就散檔。

事後還有一些插曲,第二日睇經濟日報,吹水度達90%,最尾一句更是畫龍點睛之說「其餘同伴則自行下山,再到醫院探望傷者」,太Shit,XD

呢次已經係今年第二鑊傑野,真係要好好檢討一下…

2005年6月5日

返回上頁返回首頁返回頁頂

 

Email