溯澗尋幽

  新界北區 NTN
  新界中區 NTC
  新界西區 NTW
  西貢及清水灣 SK & CWB
  大嶼山 Lantau
  九龍區 Kowloon
  香港島 HK
   
  返回溯澗尋幽目錄
  返回遊記目錄

 

澗

地圖圓墩北坑

劉領隊首度登場,帶領一眾賊人探遊徵教所,脫出後先上溯圓墩北坑,覓得澗口精彩巨瀑乙條。隨後冒烈日中暑之危一登桃坑峒,覽千島湖之全貌。最後下降桃坑峒西坑回到起點完成。

領隊:Chyee
隊員:Pui, Lok, King, Wai

 

荃灣集合,會合車長和哥哥後坐免費巴士入大欖。

先一遊和哥哥學校既開放日,一睇反恐救火表演,個恐怖份子D戲唔係好得,如果由阿威同和哥哥飾演會更佳。話係救火表演但係火花都睇唔到,真係令人氣餒。

主打都係食個靚飯,四送一湯白飯任莊,可惜只係學生先有野飲送…食飽就好上路。

在路邊發現有探監用品專門店!!先知前面係徵教所。隔離有一個比貨櫃圍住既燒烤場,咁惡劣既環境真係唯有出動大雄同多啦A夢拉客先做得住。

馬路盡處竟然比成個徵教所封哂條路,門口仲有甚具恐嚇性的告示=_\=一度令眾人為之卻步,但係回頭路,別要走,唯有同獄卒溝通溝通,發現可以穿過監獄!更亭伯伯拿出一本行山人仕紀念簿出黎,畫隻龜就可以大搖大擺入獄,行山行到入監獄,真吊。入到監獄範圍都唔識收歛一下,隊員威依然故我起度嘩哈哈大笑大嚷。競競更出色,指住囚犯:「嘩…成班監躉!」=_\=梗係想比人打橫抬返出去…

沿馬路脫離監獄,一路上完全不設防,逃獄既可行性100%,相信呢個監獄既住客都係黎渡下假三數個月,如果逃獄反而要坐返十年八載…

上一段斜路上到大欖涌水塘主壩,壩上有一個紀念碑可以一影。

九徑山、大欖涌水塘,千島湖中的小島的確係野營既好地方,無限水源,某些小島仲有港灣可供泊船,帶隻冰火號黎泛舟湖上應該會好爽。

壩尾有鐵梯可以急降水面!!今日天氣大熱,真係好想一野就跳落去。

離開水塘沿馬路繼續上行,轉個彎可以回望主壩全景。

我知好低能,但效果理想=_=||經過郊野公園入口,行多20分鐘馬路左右便到達圓墩北坑的入口,眾隊員意圖入澗之時領隊發現下源傳來極兇惡的水聲,決定一探。

退回數十米沿水務鐵梯下降水塘,一路上危機處處,落到去發現經已身中數百箭。

向右小綑一段就見到發出咆哮之聲既大瀑布!極之奇異!正值深秋竟還存在如斯狂野既瀑布,領隊解話曰上源有龍是以此瀑終年流水不斷!幸好無錯過呢個景點!

領隊露一手示範橫移之技巧,一眾隊員冒著跌落水塘既危險跟住領隊橫移。

真係超驚喜的澗口瀑布!橫移至流瀑不能跨越唯有沿瀑右上攀。成個瀑分左做三小層,三層都無乜難度,左右都可以上攀。

過左澗口瀑布後進入一石廊,沿石廊兩旁的斜壁位黏石而行,而領隊則另覓去路,一試左方石簷下小棧道,失手既話跌落下方起哂泡既澗水度就開心死。

找到巨龍所在,全靠佢先有咁出色既瀑布。過地龍後澗道左右開源。

揀右源繼續行程,又有另一個中型瀑布,瀑下附送一個淺潭。

再上,一時驚愕,竟然又有惡瀑藏於峪中!斷估有十幾廿米的高瀑,水量微弱,但係主瀑左面有濕壁,相信大水之時瀑布極有可能會蓋哂成個崖!夏天雨後要再來一趟啦!

在瀑右上攀,沿疏林翻上頂到達林道,放棄上源完成圓墩北坑既行程。上源入口的右邊有山徑可通桃坑峒頂。

感覺上極之漫長既一段路,越行越唔對路,點解個山頂去左後面,原來條路要繞一大個圈先上到頂!烈日高掛行到撻哂皮差D中暑。極之想放棄登頂快閃,可惜隊員樂攻頂意慾Max。今次唔上埋又真係唔知幾時會再黎,唉唯有捨一個命挨埋佢。

近啦近啦!黎到呢度已經得反半條人命。遠觀桃坑峒的岩壁,十分精彩!竟然成個山頭都係一塊過既露岩!抖擻精神挨埋最後一段。

越過桃坑峒西坑的上源出澗位,踏過碎石路終於到達桃坑峒的山頂。大休抖暑,風景都唔錯,北東南三個方向180度視野。但係睇唔到千島湖…

風景黎講副峰較好,可以盡覽大欖涌水塘全貌。小競競不惜爬上樹整返張全景圖。

山頂附近的一座不知明建築。大抖後繼續起行,決定原路返去副峰方向下降桃坑峒西坑撤退,但係上源入口令人極為卻步,都係大路行多一段先入澗。

再經過一段烈日乾煎,終於路過一明顯澗口位可以入澗,桃坑峒西坑這等小澗,澗道中段都有一開揚位附送一兩個小池,對於一眾就黎熱死既隊員,呢d平時不屑一顧的水池仔簡真就係生命之泉!幸有呢幾個池仔降下溫先可以挨到返去大路…

2005年11月5日

返回上頁返回首頁返回頁頂

 

Email